Казан университетында "отличник"ларны хөрмәтләделәр

- Бүгенге чарада без фәнни-тикшеренү эшчәнлегендә дә, иҗтимагый, иҗади, спорт өлкәләрендә дә зур уңышларга ирешкән студентларны олылап китәбез. Алар бөтендөнья, бөтенроссия бәйге-премияләренең җиңүчеләре һәм призерлары, – диде ректор вазыйфасын вакытлыча башкаручы Дмитрий Таюрский кичәге студентларның уңышларына тагын бер кат күз салып. 

Тантана чыгарылыш курс студентларына кызыл дипломнар тапшыру белән дәвам итте. Шулай ук 51 студент арасында һәр институттан берешәр иң яхшысы да сайлап алынды. Лаеклы 19 кешегә, дипломнан тыш, Рәхмәт хаты, тасма, статуэтка, истәлекле сувенирлар бүләк иттеләр. Шуны да әйтеп китәргә кирәк, кызыл дипломлы студентлар арасында Казахстан, Болгария, Төрекмәнстан, Нигерия гражданиннары да бар иде. 

Әлбәттә, студентлар да рәхмәт сүзләрен әйтмичә кала алмадылар. 
- Нәкъ Казан университетында без чын дусларны, үрнәк һәм ярдәмче булган укытучыларны таптык. Монда бөтен дөнья студентлары җыелган дияргә була. Бу үз чиратында ачышлар, белемнәр белән алышу, уртаклашу өчен гаять зур мөмкинлекләр ача, – диде халыкара мөнәсәбәтләр институты студенты Станислав Младенов. 

Рәхмәт сүзләреннән соң студентлар Дмитрий Таюрскийга истәлеккә кораб моделен бүләк иттеләр. “Казан федераль университеты студентлары шушы корабның җилкәннәре кебек – алар аны, барлык каршылыкларны узып, ерак-ерак җирләргә илтәләр” – диде ул.

Тантана һәр чыгарылучы студент өчен йолага әверелгән һавага   ату белән тәмамланды. 

Алсу Шәмсетдинова