Казанда Арт-галәм булдыралар

Хакатонның максаты - digital-инновацияләрне креатив индустриягә җәлеп итү. Заманча технгологияләр сәнгать өлкәсендә чагылыш табачак. Катнашучылар алдында метагаләм өчен арт-объектлар, сәхнә мәйданчыклары, милли элементлы йортлар, геройлар, артефактлар, иҗади кешеләрнең цифрлы игезәкләрен булдыру бурычы куелган.

Казан дәүләт мәдәният институты ректоры Роза Әхмәдиева катнашучыларның Россиянең төрле төбәкләреннән җыелуын, көчле командалар бик күп булуын билгеләп узды. Бик куәтле көндәшлек һәм көрәш көтелә, диде ул.

Шулай ук чара ачылышында катнашучыларны Татарстан Мәдәният министрының беренче урынбасары Юлия Әдһәмова сәламләде.

-    Менә инде ничәнче ел рәттән шушы бәйге уздырыла, ел да бу проектның географиясе киңәя. Мәдәният министрлыгы хакатонда туган һәм тормышка ашырылган проектларны күзәтеп бара. Чөнки нәкъ шушы проектлар киләчәктә Арт-галәм нигезе булачак. Бүген яшьләр алдында бар мөмкинлекләр бар, алардан файдаланырга, үз белгәннәреңне күрсәтергә генә кирәк, - диде Юлия Әдһәмова. 
Хакатонда катнашучылар - 2-5 кешедән торган командалар - 48 сәгать эчендә инновацион идеясен тормышка ашырырга һәм үз эш нәтиҗәләрен күрсәтергә тиеш. Җиңүчеләр иртәгә билгеле булачак.