#Мәгариф 05 июль 2023, 15:08

"Ышанмыйча бәхеттән еладым!"

05 июль 2023, 15:08

Татарстанда 188 укучы БДИны 100 баллга тапшырган. Без инглиз теленнән имтиханны иң югары баллга биргән Злата Стигунова белән фикер алыштык. Ул тәрҗемәче булырга хыяллана. Злата - мәктәп тарихында имтиханны 100 баллга тапшырган бердәнбер укучы икән.

Скопировать ссылку

- Имтиханны 100 баллга бирер өчен ничек әзерләндең?

- Дөресен әйтәм, бернинди онлайн-курсларга да, репетиторларга да язылмадым. Дүрт елдан артык инглиз телендә видеолар карыйм, китаплар укыйм. Һәрвакыт инглиз телендә сөйләшүчеләрне тыңладым.

- Имтиханны язма һәм телдән тапшыралар. Кайсы авыррак?

- Миңа җиңел вариант эләкте. Телдән бирә торган өлештә бер генә җирдә шикләндем. Бәхет елмайды, дөрес җавапны сайладым.

- Нәтиҗәләрне белгәч нинди хисләр кичердең?

- Нәтиҗәләр билгеле буласы көнгә кадәр төш күрдем: мин имтиханны бирә алмаганмын. Укытучым иртәнге 7дә уятты. Йөз баллны күргәч, башта ышанмадым. Кат-кат сайттан чыгып, кире кердем. Бәхеттән елап та җибәрдем, әти-әниләрем дә сөенде.

- Бер ел эчендә БДИга әзерләнеп, 100 балл алып буламы?

- Үзлектән юк. Бик яхшы укытучылар кирәк дип уйлыйм. Бөтен әйберне бер ел эчендә үзеңә генә өйрәнеп бетү мөмкин түгел.

- Башка фәннәрне ничек бирдең?

- Рус әдәбияты, җәмгыять белемен бирдем. Икесеннән дә 80нән артык балл җыйдым. Нәтиҗәләрем белән тулысынча канәгать түгел.

Кызыклы яңалыкларны күзәтеп бару өчен безнең МАХ каналына кушылыгыз.