Президентлыкка кандидатлар билгеле: дүрттән берсен сайлыйсы

Тавыш бирү участоклары 8.00 сәгатьтән 20.00 сәгатькә кадәр ачык.
Россия Үзәк сайлау комиссиясе 8 февральдә Россия Федерациясе Президенты сайлауларына кандидатларның тәгаен исемлеген раслады. Болар:

1.    Даванков Владислав Андреевич, “Новые люди” партиясе.
2.    Путин Владимир Владимирович, үзен-үзе тәкъдим итүче.
3.    Слуцкий Леонид Эдуардович, ЛДПР.
4.    Харитонов Николай Михайлович, КПРФ.

Татарстанда сайлауларда “Мобильный избиратель” механизмын файдаланырга теләп, инде 4 меңгә якын кеше гариза биргән.
– Сайлаучылар ялга яки командировкага барачакларын белеп, расписаниеләрен алдан төзиләр. “Мобильный избиратель” механизмы Россия Федерациясенең бөтен территориясендә, теләсә кайсы сайлау участогында тавыш бирү мөмкинлеге тудыра,- ди Татарстанның Үзәк сайлау комиссиясе рәисе Андрей Кондратьев.
“Мобильный избиратель” механизмын куллану өчен 11 мартка кадәр шәхси кабинетың аша Дәүләт хезмәт күрсәтүләре федераль порталында гариза бирергә кирәк. Участок сайлау комиссияләре гаризаларны 6 мартта кабул итә башлый.

Татарстанда 17 февральдән участок сайлау комиссияләре вәкилләре йортларга йөреп, сайлау турында хәбәр итәргә керешә. Әлеге вәкилләр Россия Президентын сайлау символикалы киемнәргә киенгән, “бейджик”лары һәм таныклыклары була.

Андрей Кондратьев искәрткәнчә, сайлау участоклары комиссияләре вәкилләре өй яки фатир эченә керми. Әңгәмә вакытында аларга шәхси мәгълүматларны әйтергә һәм шәхесне раслаучы документларны күрсәтергә кирәкми.