Һөнәреңнең остасы булсаң, үзеңне күрсәтергә оялып торма

Россиядә 7 ел рәттән “Һөнәренең иң яхшысы” һөнәри осталык буенча Бөтенроссия конкурсы бара. Чара “Кадрлар” илкүләм проектының “Хезмәт кешесе” федераль проекты кысаларында эшче һөнәренең дәрәҗәсен күтәрү максатыннан үткәрелә.

– Россиянең 16 төбәге конкурсның федераль этабын үткәрү башкаласы итеп билгеләнде. Татарстан 3 ел дәвамында “Радиоэлектроника аппаратурасын җыючы” номинациясендә бәйге оештыру башкаласы, ягъни, мәйданы булып торачак, – диде республиканың хезмәт, эш белән тәэмин итү һәм социаль яклау министры урынбасары Клара Таҗетдинова “Татар-информ” мәгълүмат агентлыгында үткәрелгән матбугат конференциясендә.

“Казан радиомеханика көллияте” бинасында 22-24 сентябрьләрдә “Радиоэлектроника аппаратурасын җыючы” номинациясендә конкурсның федераль этабы була. Россиянең 11 төбәгеннән конкурсантлар килә. Татарстан исеменнән Инсаф Сибгатов чыгыш ясаячак. Якташларыбыз Рузил Зәкиев, Азат Сибгатуллин, Раил Шакирҗанов төбәкләрдә үткәрелгән федераль этапларда призлы урыннарны яулап кайтканнар инде.

Татарстанда слесарь-инструментчы, радиотехник, тегүче, механизатор, радиоэлектроника аппаратурасын җыючы, очучысыз очу аппаратларын идарә итүче, зоотехник, агроном, яшелчәче, повар, фрезерчы, электр белән эретеп ябыштыручы, токарь, электрчы, бульдозерчы, ЧПУ станогы операторы һөнәрләрендә төбәк бәйгеләре оештырыла.

– Бөтенроссия конкурсына конкурсантлар предприятиеләрдән һәм уку йортларыннан алына. Һөнәр осталыгы конкурсында катнашу өчен кеше кимендә 3 ел үз профессиясе буенча эшләүче булырга тиеш. Конкурска үзен-үзе күрсәткән очраклар да булды. Үз һөнәренең остасы икән, авылдагы, мәсәлән, электр белән эретеп ябыштыручы да конкурста катнаша ала, – диде Клара Таҗетдинова.

Конкурсантлар быел бәйгенең федераль этаплары үткәрелә торган шәһәрләргә үзләре эшләгән предприятиеләр  хисабына бара. 2026 елдан Бөтенроссия һөнәри осталык конкурсына бару-кайту чыгымнарына акчаны федераль бюджет бирәчәк. Конкурста җиңүчеләргә акчалата премияләр тапшырыла.