Игорь Комаров: “Сайлаулар нәтиҗәләре сайлап алынган курсның дөреслеген раслый”

“14 сентябрьдәге сайлаулар нәтиҗәләре сайлап алынган курсның дөреслеген раслый: 2 миллион сайлаучы республикада уздырыла торган үзгәртеп коруларга теләктәшлек күрсәтте. Бу Россиядә 2025 елда сайланган төбәк башлыклары арасында иң югары нәтиҗә. Рөстәм Нургалиевич, холкыгызны һәм җиңүгә омтылышыгызны беләм, барлык башлангычларның һәм проектларның уңышлы булачагына ышанам", – дип белдерде ул.

Республиканың Идел буе федераль округында эчке төбәк продукты күләме буенча беренче урында торуын, инвестицияләр, инновацияле производстволар кертү буенча лидерларның берсе булуын һәм яңа мәгълүмати технологияләрне актив үзләштерүен дә билгеләп үтте Игорь Комаров. “Татарстан җитәкчелеге махсус хәрби операциядә катнашучыларга һәм аларның гаиләләренә системалы рәвештә ярдәм күрсәтә, төбәктә ярдәмгә мохтаҗ кешеләргә игътибар сизелә. Россиянең шефлыкка алган яңа төбәкләренә дә актив ярдәм күрсәтүен аерым билгеләп үтәргә кирәк”, – диде чыгыш ясаучы.