Илсур Метшин кабат Казан мэры итеп сайланды

– Илсур Метшин үзенең алдына һәм командасына колачлы бурычлар куярга, ә иң мөһиме, аларны гамәлгә ашырырга сәләтле җитәкче. “Бердәм Россия” партиясеннән тәкъдим ителгән Илсур Рәисовичның нигезле җиңүе, аңа казанлыларның олы ышаныч белдерүен дәлилли. Шәһәр җитәкчелеге, эшкуарлар һәм битараф булмаган казанлылар махсус хәрби операциягә, анда катнашкан кешеләргә, махсус хәрби операциядә катнашучыларның гаиләләренә, шулай ук шефлыктагы Лисичанск һәм Рубежное шәһәрләренә ярдәм күрсәтә, – дип әйтеп үтте Татарстан Рәисе администрациясе җитәкчесе Әсгать Сәфәров.

Мэр Илсур Метшин “Зур Казан” программасы кысаларында торак-коммуналь хуҗалык реформасына, сәнәгать зоналарын яңартуга, “Казан – су өстендәге шәһәр” планын гамәлгә ашыруга, шәһәр мохитен яхшыртуга игътибар юнәлтеләчәген әйтте. 

Казан муниципаль берәмлеге башлыгының беренче урынбасары итеп Денис Калинкин, ә урынбасарлары итеп Евгения Лодвигова белән Гүзәл Сәгыйтова сайланды. Гүзәл Сәгыйтова моңа кадәр шәһәр Башкарма комитеты җитәкчесе урынбасары иде.
Сессиядә шәһәрнең 2025 ел бюджетына үзгәрешләр кертелде. Керемнәр 52 миллиард 416,2 миллион, ә чыгымнар 61 миллиард 253 миллион сумны тәшкил итәчәк. Дефициттагы 8 миллиард 836,8 миллион сумны шәһәр бюджетының чыгымнарыннан калган акчалар хисабына каплау ниятләнелә.