Күп балалы гаиләләргә җир кишәрлеге урынына бирергә 500 млн сум акча каралган

Документ Татарстан Республикасы Рәисенә имзалауга җибәреләчәк.

Бюджет, салымнар һәм финанслар комитеты рәисе Леонид Якунин билгеләп үткәнчә, тәкъдим ителә торган төзәтмәләр нәтиҗәсендә 2026 елга республика бюджеты керемнәренең гомуми күләме 552,2 млрд сумнан артып китәчәк, чыгымнар күләме – 566 млрд сум, бюджет кытлыгы – 13,8 млрд сум. 2027 елда керемнәр – 578,9 млрд сум, чыгымнар – 595,8 млрд сум, дефицит – 16,9 млрд сум тәшкил итәчәк. 2028 елда керемнәр – 620,9 млрд сум, чыгымнар – 639,6 млрд сум, дефицит – 18,7 млрд сум.

– Бюджетны кабул итү җиңел мәсьәлә түгел. Әмма вазгыять ничек кенә катлаулы булмасын, ачыктан-ачык әйтергә кирәк, федераль үзәк һәм федераль бюджет ярдәме белән бу елның бюджеты республикабыз һәм аның төбәкләренең уңышлы үсеше өчен кайбер социаль мәсьәләләрне хәл итәргә мөмкинлек бирде. Киләсе елга бюджет 552 миллиард сум күләмендә бертавыштан кабул ителде. Әйе, дефицит аз түгел, әмма без хәзер дәүләт программалары буенча федераль үзәк белән берлектә аны сизелерлек киметү яки тулысынча ябу өчен бик актив эшлибез, – дип белдерде Татарстан Дәүләт Советы Рәисе Фәрит Мөхәммәтшин  парламентның уналтынчы утырышыннан соң журналистлар белән аралашканда.

Киләсе елга, шулай ук 2027 һәм 2028 елларга бюджетта күп балалы гаиләләргә җир кишәрлеге урынына акчалата түләү бирү өчен 500әр млн сум акча каралган. «Республика Рәисе бу максатларга өстәмә акча салу кирәклеге  турында фикеребезне  хуплады. Кемнең җир кишәрлеге аласы килми яки аның өчен ул отышлы түгел дип саный икән, аңа ул матди яктан компенсацияләнәчәк. Моның өчен бюджетка 500 млн сум кертелде, – дип белдерде Фәрит Мөхәммәтшин.