Рөстәм Миңнеханов һәм Минтимер Шәймиев Җиңү паркында Бөек Ватан сугышы геройларын искә алдылар

Тантанада шулай ук Татарстан Дәүләт Киңәшчесе, Россиянең Хезмәт Герое Минтимер Шәймиев, Татарстан Премьер-министры Алексей Песошин, ТР Дәүләт Советы Рәисе вазыйфаларын башкаручы Марат Әхмәтов, ТР Дәүләт Советының мактаулы рәисе Фәрит Мөхәммәтшин, Казан мэры Илсур Метшин катнашты.

Җиңү стеласы янында Рөстәм Миңнеханов ветераннарны, шулай ук республиканың иҗтимагый-патриотик һәм яшьләр оешмаларында катнашучыларны сәламләде. 

Аннары Рөстәм Миңнеханов, Минтимер Шәймиев һәм Алексей Песошин Мәңгелек утка чәчәкләр салып, һәлак булган совет сугышчыларын искә алдылар. Бер минут тынлыктан соң Россия Федерациясе һәм Татарстан Республикасы гимннары яңгырады. Марш белән Казан гарнизонының почет каравылы ротасы үтте.

Аннары кунаклар һәлак булган сугышчыларның Аналары һәм тол хатыннары монументына, Совет солдаты Монументына чәчәкләр салдылар.

Шуннан соң Рөстәм Миңнеханов махсус хәрби операция ветераннары белән аралашты. Ул свода катнашучылар истәлегенә мемориаль зона төзү проектын гамәлгә ашыру турында сөйләде, шулай ук истәлекле ташка чәчәкләр салды. 

Аннары республика Рәисен Россия Хәрби-Диңгез флоты ветераннары һәм «Татарстан Республикасы Диңгез җыелышы»иҗтимагый оешмасы әгъзалары сәламләде. Диңгезчеләр гадәттәгечә Җиңү паркында «Казан»К-403 су асты көймәсе янында җыела. Истәлекле фотога төшерү булды.

Казан гарнизоны гаскәрләренең тантаналы парады узачак Меңьеллык мәйданына Рөстәм Миңнеханов һәм Минтимер Шәймиев раритет «ЗИЛ»автомобилендә юл тоттылар.