Рөстәм Миңнеханов: “Республика халкы һәм киләчәк буыннар алдында җаваплы булуымны аңлыйм”

«Татарстан Рәисе вазифасына керешкәндә, иң элек күрсәтелгән ышаныч өчен барлык гражданнарга да рәхмәт белдерәсем килә. Татарстанның күпмилләтле халкы сайлавын кабул итеп, республиканың барлык халкы, гореф-гадәтләрне һәм туган җиргә мәхәббәтне саклаган һәм безгә тапшырган ата-бабаларыбыз, шулай ук киләчәк буыннар алдында җаваплы булуымны аңлыйм. Бөек Ватан сугышы елларында азатлык өчен көрәшкән ветераннар һәм аларның махсус хәрби операция барышында илнең иминлеге өчен көрәшүче варислары алдында баш иям. Һәр ветеранның, һәр ватанны саклаучының һәм аларның гаиләләренең иминлеген тәэмин итү шәхсән минем һәм шулай ук барлык хакимият органнарының бурычы", – дип белдерде ул. 

Рөстәм Миңнеханов чыгышында республикага шәхси ярдәме һәм игътибары өчен Россия Президенты Владимир Путинга һәм премьер-министр Михаил Мишустин җитәкчелегендәге ил хөкүмәтенә рәхмәт сүзләрен җиткерде. "Әлбәттә инде, безнең беренче президентыбызга, Россиянең хезмәт Героена, минем остазым Минтимер Шәймиевкә!" – дип рәхмәт сүзләерн җиткерде Татарстан Рәисе.

"Безнең эш үзәгендә – кешеләр турында кайгырту. Нәкъ менә кеше республиканың 2030 елга кадәрге социаль-икътисади үсеш стратегиясенең үзәк өлеше, ә гражданнарның тормыш сыйфатын күтәрү безнең өстенлегебез булып тора. Бу юнәлештә эшне алга таба да дәвам итәчәкбез», – диде Рөстәм Миңнеханов.