Рөстәм Миңнеханов: Татарстан Оман Солтанлыгы белән хезмәттәшлекне үстерүгә аерым әһәмият бирә

Рөстәм Миңнеханов билгеләп үткәнчә, Татарстан Россия һәм Оман арасындагы дустанә мөнәсәбәтләрне ныгыту өчен Оман Солтанлыгы белән хезмәттәшлекне үстерүгә аерым әһәмият бирә.

Ул узган елның апрелендә Солтанлык җитәкчесенең Россиягә визиты кысаларында ике дәүләт башлыкларының сөйләшүләрендә катнашуын искәртте.

Республика Рәисе Оман делегациясенең «Россия – Ислам дөньясы: KazanForum» халыкара икътисадый форумында катнашу мөһимлеген ассызыклады һәм быел да катнашырга чакырды.

"Без икътисадый һәм инвестицион элемтәләребезнең алга таба үсешен бик мөһим дип саныйбыз. 2023 елда Татарстан-Оман товар әйләнеше 15 тапкырга артты һәм $20 млн тәшкил итте», - дип игътибарны юнәлтте Рөстәм Миңнеханов. Әмма соңгы елда кимү теркәлгән.

"Безнең хезмәттәшлек өчен мөмкинлекләр, беренче чиратта, икътисадта күп. Безгә үзара сәүдә күләмнәрен арттыру буенча эшләргә кирәк", - дип ассызыклады республика Рәисе.

Аерым алганда, энергетика, сәнәгать, нефть химиясе, авыл хуҗалыгы, мәгълүматлаштыру кебек юнәлешләр аталды.

Рөстәм Миңнеханов кыскача гына Татарстанның сәнәгать һәм икътисадый потенциалына тукталды һәм республика - Россиянең ислам дөньясы белән багланышларын үстерүнең танылган үзәге, дип ассызыклады. Ул шулай ук якын арада Оманда Татарстан Республикасы вәкиле эшли башлаячак, дип хәбәр итте.

Мулхәм Әл Җәрф Рөстәм Миңнехановка Татарстан-Оман мөнәсәбәтләрен төзүдә шәхсән катнашуы өчен рәхмәт белдерде. Ул Татарстанга форумга баруын искә төшерде һәм аеруча кунакчыллык күрсәтелүен билгеләп үтте. Махсус киңәшче ассызыклаганча, алар өчен иң кызыклы юнәлешләр - азык-төлек иминлеге, IT һәм ясалма акыл. Балалар өчен хәләл юнәлеш аеруча кызыксындыра.

"Оманны Сезнең икенче Ватаныгыз дип саный аласыз. Без Сезнең белән хезмәттәшлек итәргә телибез», - дип мөрәҗәгать итте Оман Инвестиция агентлыгының махсус киңәшчесе.

Ул Агентлыкның вәкиллекле делегациясен формалаштырачагын һәм киләчәк KazanForum га юллаячагын белдерде.

ТР Рәисе Матбугат хезмәте