Татарстан беренче тапкыр Татарстан Рәисен сайлады

Биш ел элек булган сайлаулардагыга караганда, бу нәтиҗә югарырак, ул вакытта Рөстәм Миңнеханов 83,28 процент тавыш җыйган булган.
Икенче урында Хафиз Миргалимов, аның өчен сайлаучыларның 4,97 проценты тавыш биргән. Өченче урында – 4,20 процент тавыш белән Руслан Йосыпов. Виталий Смирнов өчен Татарстан халкының 1,90 проценты тавыш биргән.

Бердәм сайлау көнендә, 17 мең кеше катнашында, Exit-pool социаль тикшеренүе үткәрелгән иде, һәм аның нәтиҗәләре буенча да Рөстәм Миңнехановның лидер булачагы фаразланды. Сайлаучылар сайлаудан чыккач, кем өчен тавыш бирүләре белән уртаклашканнар. Социаль фәлсәфи фәннәр һәм массакүләм коммуникацияләр институты директоры Мария Ефлова сүзләренчә, бу тикшеренү төгәл мәгълүмат бирми, әмма сайлау нәтиҗәләрен фаразларга ярдәм итә.

Exit-pool буенча Рөстәм Миңнеханов өчен 89.1 процент, Хафиз Миргалимов өчен 4,5 процент, Виталий Смирнов өчен 1,5 процент, Руслан Юсупов өчен 3,9 процент кеше тавыш биргән. 

Шулай ук республика халкы Мәләкәс округы буенча Дәүләт Советы депутаты һәм 7,5 меңнән артык муниципаль берәмлек депутатлары өчен тавыш бирде. 

Активлык күрсәттеләр
Якынча мәгълүматларга караганда, сайлауларда сайлаучыларның гомуми санының 77,01 проценты катнашкан. Рөстәм Миңнеханов «Казан» гаилә үзәге янында узган «Гаилә белән сайлыйбыз» концертында Татарстан халкына актив гражданлык позициясе өчен рәхмәт әйтте.
Ул шулай ук махсус хәрби операция уздыру зонасында хәрби хезмәт узучы гражданнар да тавыш бирә алуын белдерде. 

– Болар барысы да республикабыз, илебез патриотлары булуыбыз турында сөйли. Республикабыз тагын да матурайсын өчен сезнең һәркайсыгыз үз өлешен кертә, – диде Рөстәм Миңнеханов.

Татарстан Рәисен сайлаулар бәйрәм мохитендә, оешкан төстә тыныч узды. Татарстан Үзәк сайлау комиссиясе рәисе Андрей Кондратьев белдергәнчә, Үзәк сайлау комиссиясе кайнар линиясенә 870 шалтырату килеп ирешкән. «Барысы да мәгълүмати, белешмә характерында. Хәвефле шалтыратулар булмады», – диде ул.

Татарстанлылар актив рәвештә "Мобиль сайлаучы" сервисыннан файдаланган. Шул рәвешле 43 меңнән артык кеше үзенә уңайлы участокны сайлаган. Андрей Кондратьев Татарстанда барлыгы 2752 сайлау участогы эшләгәнен, хастаханәләрдә, шифаханәләрдә, тикшерү изоляторларында, Казан аэропортында 42 сайлау участогы оештырылганын искәртте.

Республикадан читтә 6 экстрерриториаль участок эшләгән. «Сайлау участокларына килгәннәрнең бәяләмәләренә караганда, бу уңышлы карар булды. Без хәзерге вакытта Мәскәүдә булганнарга сайлау хокукын бирдек. Аларның тавыш бирүне оештыруга карата уңай мөнәсәбәтен күрдек», – диде республиканың Үзәк сайлау комиссиясе рәисе.

Бердәм сайлау көнендә 2 мең 752 сайлау участогы эшләде. Сайлауларны оештыруда һәм уздыруда 22 меңгә якын сайлау комиссиясе әгъзасы җәлеп ителде. 
14 сәгатьлек телемарафон
Бердәм сайлау көнендә "ТНВ-Татарстан" һәм "ТНВ-Планета" телеканалларында 14 сәгатьлек "Мин яратам сине, Татарстан" дип аталган телемарафон оештырылды. 
Көн дәвамында студиядә барлыгы 150 кеше булып китте. ТНВның зур студиясе ишегалдын хәтерләтә иде. Чәчәкләр, агачлар, шәһәр урамы манзаралары. Ә кунаклар, кич утырырга чыккан күршеләр кебек, эскәмияләрдә утырып аралашты. Гаиләләре белән килүчеләрнең балалары уен мәйданчыкларында уйнады. "Безнең ишегалды" республика программасына нәтиҗә буларак оештырылган проектларда катнашучылар Татарстанның төрле районнарыннан килгән иде.
Марафонның төп бүләге – Соллерс машиналары икесе дә Әлмәткә китте. Аннан тыш унбер бәхетле гаилә iPhone 16 смартфонына ия булды. 
Сайлау көнендә «Казан» гаилә үзәге янында  «Гаилә белән сайлыйбыз» фестивале дә узды. Концертка якынча 64 мең кеше җыелган. Әмма, Казан мэры Илсур Метшин эшлекле дүшәмбедә хәбәр иткәнчә, Эчке эшләр идарәсе мәгълүматлары буенча, Рөстәм Миңнеханов сәхнәгә чыккан мизгелдә рамкалардан 115 мең кунак узган.
Чарада Алсу, Клава Кока, «Дискотека Авария» төркеме, шулай ук татар җырчыларыннан Гүзәл Уразова, Фирдүс Тямаев һәм Салават Фәтхетдинов җырлады.
Концерт программасыннан тыш, тамашачылар өчен тематик мәйданчыклар: патриотик зона, хәйрия ярминкәсе һәм мастер-класслар да эшләде.