Татарстан парламенты милләтара дуслык һәм хезмәттәшлек тарафдары

Әлеге күргәзмә парламентның 30 елдагы киңкырлы эшчәнлеген чагылдыра. Биредә Россия төбәкләреннән һәм чит илләрдән килгән делегацияләр бүләк итеп калдырган сувенирларны, әйберләрне күрергә мөмкин. Татарстан предприятиеләре җитештерә торган продукция үрнәкләре дә куелган. Татарстан парламентының Луганск Халык Республикасына, махсус хәрби операциядә катнашучыларга ярдәме аерым бер тема булып тасвирлана. Экспозициядә Дәүләт Советының төбәкара һәм халыкара элемтәләрне, дуслыкны ныгытудагы эшчәнлеге яктыртыла.

Күргәзмәне рәсми ачу тантанасында Дәүләт Советының элеккеге чакырылыш депутатлары, бүгенге парламентарийлар, дәүләт һәм җәмәгать эшлеклеләре катнашты.

– Татарстанның беренче Президенты Минтимер Шәймиев әйдаманлыгында республиканың парламенты да халыкка хезмәт итте. Хәзер бу эшчәнлегебезне Татарстан Рәисе Рөстәм Миңнеханов җитәкчелегендә дәвам итәбез. Татарстанда 175 милләт һәм  халык яши, халыклар ассамблеясы эшли, туган телләр өйрәнелә. Үзара дуслык республика үсешенә ярдәм итә, – диде Татарстан Республикасы Дәүләт Советы рәисе Фәрит Мөхәммәтшин.

Ул элек булган кайбер вакыйгаларны да искә төшерде.

– Мәскәүдән килеп Анатолий Чубайс безгә республикадагы заводларны сатып бетерергә куша иде. Ул вакытта Минтимер Шәймиев мондый адымга кискен каршы торды. Заводларны шәхси кулларга сатып бетерсәк, ни эшләр идек бүген? Эре предприятиеләр сатылмады, ә акционерлык җәмгыятьләренә генә әйләндерелде. Хәзер безгә Россия Президенты Владимир Путин:”Татарстан – илнең терәк төбәге”, дип әйтә. БРИКС саммитын, “РОСТКИ” халыкара форумын үткәрү Татарстанга ышанып тапшырылды. Россия, Татарстан белән элемтәдә булган чит ил дусларга, сайлаучыларга, барлык чакырылышлардагы депутатларга рәхмәт! Авыл алдында баш иябез! Авыл халкы мәдәниятләрне саклый, тырышып хезмәт итә, – диде Фәрит Мөхәммәтшин.

Татарстанның Иҗтимагый палатасы рәисе Зилә Вәлиева, Казахстанның Казандагы генераль консулы Ерлан Искаков, республиканың мәдәният министры урынбасары Ленар Әхмәтҗанов үзләренең чыгышларында Татарстан парламентының республика үсешенә лаеклы хезмәт өлеше кертүе, дуслык һәм бердәмлекнең мөһимлеге турында әйттеләр. Татарстанның халык шагыйре Ренат Харис:”Татарстанның дәүләт символлары – Флагны, Гербны, Гимнны кабул итү иң дулкынландыргыч мизгелләр булды”, – дип хатирәләре белән уртаклашты.