«Ел табибы – 2026»: Татарстанда «Ак чәчәкләр» премиясе җиңүчеләре билгеле булды

Конкурс уздырылган барлык еллар дәвамында аның миссиясе үзгәрешсез кала – табиб һөнәренең абруен күтәрү һәм җәмгыятьтә аның әһәмиятен үстерү, шулай ук белгечләрне үз-үзен камилләштерергә этәрү. 

Быел, традицион «Ел табибы» һәм «Уникаль очрак»тан тыш, конкурста яңа номинацияләр күп иде. Алар арасында: "Шәфкатьлелек һәм кайгырту" , "Сәламәтлек синергиясе: команданың көче гамәлдә", "Яшь гвардия".

«Сәламәтлек саклау легендасы» традицион номинациясе дә быел яңача яңгырый - «Һөнәргә тугрылык».

Яңалыкның тагын берсе - номинацияләрдә җиңүчеләр исеме сәхнәдә генә билгеләнде. Финалга чыгучылар исемнәре язылган конвертлар барабанда әйләндерелеп, очраклы рәвештә сайлап алынды. 

Шулай итеп, "Ел табибы - 2026" исеменә Республика балалар клиник хастаханәсенең балалар реаниматологиясе хезмәте җитәкчесе, Татарстан Сәламәтлек саклау министрлыгының штаттан тыш баш балалар анастезиолог-реаниматологы Анна Тимофеева лаек булды. Бүләкләү тантанасыннан соң, җиңүче хис-кичерешләре белән уртаклашты. Ул үзе өчен бу җиңүнең көтелмәгән булуын әйтте, чөнки башка номинантлар да бик көчле белгечләр. Үзе исә ул кечкенәдән табиб, нәкъ менә анестезиолог-реаниматолог булырга хыялланган. Наркоздан айныганнан соң баланың бәхетле күзләре, елмаюы-көлүе аның өчен һөнәрендә иң кадерлесе булуын билгели ул. 

«Шәфкатьлелек һәм кайгыртучанлык» номинациясендә җиңүне Казанның 6нчы поликлиникасы ашыгыч ярдәм бүлеге шәфкать туташы Марина Кузнецова яулады.

"Уникаль очрак" номинациясендә ДРКБ командасы табиблары җиңде. 

"Яшь гвардия" номинациясендә финалга чыгучылар арасыннан бер җиңүчене генә аерып ала алмаганнар, аларның барысы да махсус дипломнарга ия булды.