Сәламәтлек саклау министры Абашев яман шешләрнең кемнәрдә ешрак теркәлүен атады

“Бигрәк тә авылларда онкопациентлар санының 30 процентка азрак булуы борчулы сигнал булып тора. Шул ук вакытта, яман шешләрнең азу очраклары күрсәткечен анализлаганда, алар авыл кешесендә ешрак теркәлә. Бу хәл аларның соң мөрәҗәгать итүен һәм профилактик чараларга аз җәлеп ителүен күрсәтә”, - дип белдерде Татарстанның сәламәтлек саклау министры Альмир Абашев җиденче чакырылыш Татарстан Дәүләт Советының унҗиденче утырышында.
Бүген республикада авыл халкына медицина ярдәмен 43 үзәк район хастаханәсе күрсәтә, алар составында 1 мең 663 ФАП эшли. Шуларның 334е капиталь ремонт үткәрүгә мохтаҗ.

2026 елда 16 районда 150 миллион сумга 33 ФАП ремонтлау планлаштырыла. Шулай итеп, беренчел исәпләүләр буенча, ФАПларны реновацияләү программасы якындагы биш-алты елда тәмамланачак, - дип хәбәр итте докладчы.

Югары квалификацияле медицина ярдәмен авыл кешесенә якынайту өчен 27 күчмә мобиль комплекс эшли, шуларның 5се - мобиль сырхауханәләр, алар ярдәмендә авылга югары технологияле медицина үзәкләре белгечләре чыга. Соңгы биш елда мобиль комплексларга мөрәҗәгать итүчеләрнең уртача еллык саны 3,5 тапкырга арткан.

Балалар сәламәтлеге торышына килгәндә, спикер билгеләп үткәнчә, балалар арасында авырулар таралу күрсәткечләре һәр балада уртача бер-ике хроник чир барлыгын күрсәтә. Иң күп өлешне сулыш органнары, ашкайнату һәм күз авырулары алып тора. Шул ук вакытта балалар үлеме күрсәткечләре ел саен кими.
Казанның 7 нче хастаханә базасында һәм Әлмәттә яңа перинаталь үзәкләр ачу сабыйлар үлемен киметү мөмкинлеген биргән. Соңгы ике елда республикада әни кешеләр үлеме очракларының берсе дә теркәлмәгән.

Республикада халык үлеменең төп сәбәпләре - кан әйләнеше системасы һәм онкологик авырулар. “Медицина ярдәменең әлеге профиленә дәүләтнең аерым игътибары юнәлтелгән, - дип белдерде Альмир Абашев. - Халык үлемен киметүдә профилактик чаралар төп инструмент булып кала. 2025 елда республика халкының яртысы диспансеризация һәм профилактик медицина тикшерүләрен узды.

Шуны да билгеләп үтәргә кирәк, профилактика эшләренең планлы күләме 2019 ел белән чагыштырганда ике тапкырдан күбрәккә арткан. 2025 елда профилактик чаралар барышында беренче тапкыр 108 мең 028 авыру ачыкланган, шуларның 85 проценты диспансер күзәтүенә алынган. 1 мең 524 яңа яман шеш очрагы расланды. Тикшерелүчеләрнең 20 проценты сәламәт дип табылды. Өстәмә рәвештә һәр унынчы кешенең теге яки бу авыруы көчәю куркынычлары ачыкланган”.

Диспансер хисабында 1 миллион 200 меңнән артык кеше исәпләнә. 2025 елда диспансер күзәтү кысаларында медицина хезмәтләрен 900 меңнән артык кеше алган.