“Кеше үзенең С гепатиты белән авыруын белмәскә дә мөмкин”

Ел саен республикада 35-40 кеше авыруны йоктыра, Россия буенча бу сан 12-15 меңгә җитә.

С гепатиты – бавыр эшчәнлеген бозучы йогышлы авыру. Ул, нигездә, кан аша йога. Медицина оешмаларында җиһазларның, тату һәм тырнак ясау кебек матурлык процедуралары җиһазларның тиешле дәрәҗәдә эшкәртелмәве, очраклы җенси мөнәсәбәтләр авыру йоктыру куркынычын тудыра.

- Һәркемнең үз кырынгычы, теш чистарткычы булырга тиеш. Бу, беренче чиратта, шәхси гигиена таләбе. Икенчедән, саклану чарасы да, - ди Татарстан буенча эпидемиологик күзәтү бүлеге башлыгы Лилия Юзлибаева.

Шулай ук авыру - анадан балага да күчә ала. С гепатиты кочаклашканда, төчкергәндә һәм йөткергәндә, азык-төлек продуктлары аша күчә алмый. Ләкин авыру күпвакыт симптомнарсыз уза.

- Кеше үзенең С гепатиты белән авыруын белмәскә дә мөмкин. Шуңа: “Хәлем юк”, - дип зарланган кешене ялкау дип әйтү дә урынлы булмый, чөнки бу С гепатитының симптомы булырга мөмкин. Авыруга каршы вакцина юк, әмма аны дәвалап була. Ләкин шунысы да искәртәсем килә: С гепатиты белән озак вакыт авыручыларда онкология үсеш алырга мөмкин. Шулай ук бавырдан тыш бөер, йөрәк, кан системалары да зыян күрә ала, - ди  Татарстан сәламәтлек саклау министрлыгының штаттан тыш баш инфекционисты Халит Хаертынов.

Бу елдан яңа таләпләр буенча диспансеризация кысаларында 25 яшьтән өлкәнрәк һәркем 10 елга бер С гепатитына анализ тапшырачак. Шулай ук Татарстанда С гепатиты белән авыручы балалар булмау да уңай динамиканы раслый.