Сәламәтлек саклау министры кайсы районнарга табиблар җитмәвен атады

Шулардан дәүләт секторында 14 мең 71 табиб һәм 36 меңнән артык урта медицина хезмәткәре хезмәт куя. Бу хакта җиденче чакырылыш Татарстан Дәүләт Советының унҗиденче утырышында Татарстанның сәламәтлек саклау министры Альмир Абашев хәбәр итте.

– Шунысын да билгеләп үтәргә кирәк, муниципаль районнар арасында табиблар белән җитәрлек дәрәҗәдә тәэмин ителеш тигез түгел. Халык саны 50 меңнән 500 меңгә кадәр булган шәһәр берәмлекләре иң депрессив санала, аларда «Земский доктор», «Земский фельдшер» программалары гамәлгә ашырылмаган, беренчел звеноны модернизацияләү программасына эләкмәгән. Аларда махсус социаль түләүләр дәрәҗәсе авыл җирлегенә караганда күпкә түбәнрәк, - дип сөйләде докладчы.

Әлеге районнар арасына Лениногорск, Чистай, Бөгелмә, Зәй, Минзәлә һәм Түбән Кама районнары керә.

– 2025 ел нәтиҗәләре буенча без кадрлар хәрәкәте буенча уңай баланска ирештек, тармакка 239 табиб килде. Без кадрлар мәсьәләсен комплекслы хәл итәргә тәкъдим итәбез. Беренчедән, проблемалы районнарда хезмәт хакы буенча юл карталарын яңадан карарга, икенчедән, яңа җәлеп ителгән белгечләр өчен торак базары үсешенең муниципаль планын төзергә. Өченчедән, яшь белгечләрне эш урынында калдыру максатыннан, әлеге районнарның стационарларын һәм поликлиникаларын технологик яктан өстәмә җиһазлау. Шулай итеп, 2026 елга сәламәтлек саклау тармагы эшенең абсолют өстенлеге булып түбәндәгеләр тора: белгечләр җитмәгән районнарда кадрлар потенциалын арттыру, сыйфатлы инфраструктураны үстерү эшен дәвам итү, халык белән коммуникацияләрне камилләштерү, - дип ассызыклады Альмир Абашев.