Камал һәм Тинчурин театры артистларына мактаулы исемнәр бирелде!

Белешмә:
Илтөзәр Мөхәммәтгалиев 1995 нче елдан Камал театры труппасы артисты. 30 ел эчендә Илтөзәр әфәнде төрле характерлы, берсеннән-берсе аерылып торган рольләр уйный. Аның актёрлык диапазоны классик әсәрләрне дә, заманча драматургиягә нигезләнеп куелган спектакльләрне дә үз эченә сыйдыра. 

2025 нче елда телевизор экраннарына Мөхәммәд Мәһдиев әсәре буенча "Кеше китә, җыры кала" сериалы чыкты. Күп еллар Камал театры сәхнәсен гөрләткән Илтөзәр әфәнде шушы сериал аша тагын да зуррак тамашачы мәхәббәте яулады. Әйтергә кирәк, әле күптән түгел генә чыккан премьера - Туфан Миңнуллинның "Әлдермештән Әлмәндәр" спектаклендә Ястәгнәй роле дә аңа карата булган яратуны арттырды булса кирәк.

1998 елдан Кәрим Тинчурин театрында хезмәт итүче Ирек Хафизов драма әсәрләрендә дә, комедиягә корылган әсәрләрдә дә уйнап тамашачы мәхәббәтен яулады. 

Ирек әфәндене дә тамашачылар театр актёры буларак кына түгел, ә популяр татар сериаллары аша да таный. Алай гына да түгел, ул үзе дә хәзер күп кенә фильмнарга актёрлар җыю белән шөгыльләнә - аны кастинг директоры буларак та беләбез. 
Тинчурин театрында эшләү дәверендә уйнаган дистәләгән рольләренә театрның агымдагы репертуарына апрель аенда гына өстәлгән "Әни килде" (Шәриф Хөсәенов) спектаклендәге Ислам роле дә бик уңышлы килеп кушылды.

Яраткан актёрларыбызны мактаулы исем алулары белән котлыйбыз! 

Таңсылу Мостафина