Камал театрында легендар спектакль яңара. “Әлдермештән Әлмәндәр” яңадан сәхнәдә

Легендар әсәрдә Өммия ролен башкарачак Татарстанның атказанган артисты Алсу Каюмова бу хәбәрне төрле хисләр белән кабул иткән.

— Бу хәбәрне белгәч, шатлану белән бергә курку хисе дә туды. Мин аның бик зур җаваплылык икәнен аңлыйм, чөнки Нәҗибә Ихсанова апаны кабатлау дөрес тә түгел, мөмкин дә түгел. Ничек кенә булмасын, режиссёр сиңа ышанып шундый роль биргән икән, хәлдән килгәнчә тырышырга гына кала, — ди ул.

– Билгеле булганча, Өммия образы күпләр өчен нәкъ менә Нәҗибә Ихсанова исеме белән бәйле. Шуңа күрә чагыштырулар да котылгысыз.

– Әлбәттә, беренче куелыш белән чагыштыру һичшиксез булачак, бу — табигый, без моңа әзер. Ләкин икенче куелыш та үз тамашачысын табар дип уйлыйм, иншалла, — дип белдерә актриса.

– Өлкән яшьтәге карчык образын тудыру — бер үк вакытта кызык та, катлаулы да эш. Тамашачы күңелендә аеруча истә калган “Үүүләәәм!” сүзе дә яңгыраячак.

— Әйе, Нәҗибә апаның “үллләме” бөтен кешенең дә исендә. Ләкин ул пьесаның текстында язылган, шуңа күрә ансыз булмый инде. Минем үземә дә бу легендар спектакльдә элек онык һәм Йөзембикә рольләрен уйнарга туры килде, барысы да күз алдында, колакта яңгырап тора. Бу, әлбәттә, кабатланмас өчен билгеле бер кыенлыклар тудыра. Әмма иҗатта җиңел эшнең кызыгы юк. Профессиональ артист үзенең эше белән беркайчан да канәгать булырга тиеш түгел. Шуңа күрә эшләргә дә эшләргә! Яңа куелыш та тамашачы мәхәббәтен яулар, дигән өмет зур.

Белешмә өчен: Марсель Сәлимҗанов куйган «Әлдермештән Әлмәндәр» спектакле 1976–2009 елларда зур уңыш белән барды һәм татар театры тарихында якты эз калдырды.

Таңсылу Мостафина