Айгөл Бариева: «Кызлар бик актив, әлһәмдүллиләһ. Ә егетләр азрак әле...»

Шуның кысаларында шарт буенча катнашырга теләк белдергән егет-кызлар бер урында очрашалар. Танышу өчен нибары 5 минут бирелә. Вакыт үткәч, катнашучы икенче берәү белән танышуны башлый. Шулай итеп, кеше бер очрашуга килеп, берьюлы берничә кеше белән таныша. Бер-берсен ошатканнар аралашуны дәвам итә ала. Бу яңа проектның үзенчәлекләре турында Айгөл Бариевадан белештек. 

– Ни өчен нәкъ менә танышу, кавышуга бәйле проект башларга булдыгыз?
– Танышларым арасында бик уңган, чибәр, тырыш кызлар күп. Әмма алар – ялгыз. Үземнең балаларым да гаиләсез әле. Танышу, үз ярыңны табу хәзер заман проблемасына әйләнде. Күпләр мәхәббәт эзләп тә, кавыша алмыйлар. Пандемия, социаль челтәрләр үсеше безне барыбызны да дүрт дивар арасында калдырды. Менә шушы проблеманы хәл итү өчен – офлайн,  гадәти тормышта күзгә-күз карап, таныша торган проект булдырдык. “Үз кешеңне тану өчен 5 минут вакыт та җитә”, – диләр. Әлбәттә, һәркем үз ярын табачак дип вәгъдә итә алмыйбыз. Әмма без аралашу, танышу өчен мәйданчык булдырдык. Татар гаиләләре саны артсын өчен тырышабыз, проект бары тик татар яшьләре өчен. Әле эшне башлап кына җибәрдек, шулай да беренче уңышларыбыз белән уртаклаша алабыз. Бер очрашуда 68 катнашучы арасыннан 22 пар барлыкка килде. Пар дип әйтүем, очрашу нәтиҗәсендә бер-берсен ошаткан егет һәм кызны аңлата. Шушы 22 пар арасыннан 3 кенә гаилә туса да, бу  – зур нәтиҗә булачак. Очрашулар оештыру җиңел түгел, бик күп көч, вакыт таләп итә торган эш. Ильвираның да, минем дә, моннан тыш үз эшләребез бар бит әле. 

 – Проект кемдә күбрәк кызыксыну уятты?
 – Кызлар бик актив, әлһәмдүллиләһ. Ә егетләр азрак әле. Гомумән, беренче адым ясарга курыкмаучы ир-атлар, хәзерге вакытта, бик аз. Шулай да бирешмибез. Социаль челтәрдә фотосурәтләр артында качып утырып кына булмый. Сөйләшергә, аралашырга, очрашырга кирәк. Чыннан да, гаилә корасы килгән кешеләр безнең проектка кушыла ала. Безнең аерым телеграмм-каналыбыз да бар. Проект белән кызыксынучылар күп. Әле 1 ай вакыт та үтмәде, язылучылар саны 900гә җитте. Димәк, безнең эшчәнлек актуаль. “Мәхәббәт  – ул син” проектында  катнашу өчен бер катнашучыбыз  Чувашиядән, икенчесе  – Владимирдан, өченчесе  – Башкортстаннан ук килде. Татарлар бөтендөнья буйлап, төрле тарафларда яши. Бәлки, киләчәктә проект дөньякүләм танылу да алыр.

 – Кешенең ялгыз булуын ничек тикшерәсез?
 – Паспортны карыйбыз. Калганы һәркемнең үз намусында инде.

– Ә үзегез тагын бер кат гаилә корыр идегезме?
 – Үземә бернинди киртәләр дә куймыйм. Чөнки Аллаһ Тәгалә безне парлы итеп яраткан. Ләкин минем өчен хисләр мөһим. Әгәр йөрәгем янмый икән, янымда ир-ат булсын дип кенә кияүгә чыга алмыйм. Әлбәттә, күңелемә якын кеше булса, бәлки. “Юк, мин бүтән гаилә кормыйм”,  – дип кистереп әйтмим. Барысы да Аллаһ кулынды.