Алия Карачурина: "Кемдер белде, кемдер сизенде..."

- Мөнәсәбәтләрегез ничек башланды?
- Без клубта таныштык. Ришат чыгыш ясаганга күрә генә беренче тапкыр клубка бардым. Янына килеп аның баянчысы белән аралашуын һәм шул дустымның Ришат янына килергә кушуын әйттем. "Ә, син шул Алияме?" - диде миңа Ришат. Бер күрүдән гашыйк булу димәс идем. Ләкин мин бик каушадым, чөнки Ришат Төхвәтуллин үзе бит бу! 

- Ә аннары?
- Аннары берникадәр вакыттан соң без Ваһапов фестивалендә күрештек. Ул телефон номерымны сорап алды. Ләкин ул номер ватсапка бәйләнмәгән иде. ВКонтакте челтәрендә языша башладык. Аннан соң ул миңа нәрсәдер җибәрергә теләде. "Җибәрер идем, ләкин син ватсапта юк бит", - диде. Һәм мин аңа ватсап номерын бирдем. Беренче "свидание" 2015 елның 10 июнендә булды. Дөресен генә әйткәндә, без бик озак очраштык. Бу вакыт эчендә нәрсә генә булмады. Хәзер без бер-беребезгә яңадан гашыйк булган, барысы да яңадан башланган кебек.

- Никах көне билгелеме инде?
- Билгеле. Барысын да белерсез, күрерсез, Аллаһы боерса. Хәзер без бернәрсәне дә яшермибез.

- Ни өчен мөнәсәбәтләрегезне яшердегез?
- Ришат өчен бу бик мөһим адым иде. Ул шулай теләде. Ә мин аның карарын хөрмәт иттем. Тавыш чыгарырга идемени? (көлә)

- Сезнең очрашып йөргәнегезне эстрада йолдызлары белдеме?
- Кемдер белде, кемдер сизенде.

- Моңа кадәр Ришат тәкъдим ясаган идеме әллә? Ни өчен ул "хәзер син ризамы?" диде?
- Юк, ясамады. Ул шундый күңелгә үтеп керерлек сүзләр әйтте. Миңа озак көтәргә туры килүе, күп сынаулар аша узуым, шушы вакыт дәвамында мине тикшерүе турында сөйләде. Шуңа "хәзер ризамы син? дип сорады.

- Ришатның тәкъдим ясаячагын алдан белдегезме?
- Юк, әлбәттә. Аның борчылып утырганын, кич буе шул хакта уйлаганын сизмәдем дә. Ул моны аннары гына әйтте. Миңа күпләр "8 мартта яки 14 февральдә тәкъдим ясаячак" диде. "Пффф, ясамаячак", дидем. Мөгаен, көтә-көтә арыганмындыр, шуңа күрә ничек бар, шулай кабул иттем.

- Эстрада артистлары арасында тагын берәрсе белән очрашып йөрдегезме?
- Юк инде. Ришатка кадәр җитди мөнәсәбәтләрем булмады. Мәктәп елларында гына бер егет белән берничә ай очрашып йөрдек.

- Ришатны аның иҗатына гашыйк булучы кызларга көнләшәсезме?
- Юк. Әмма көнләшергә сәбәпләр булды. Аннан соң иҗатка гашыйк булучыларның да төрлесе була...

- Ир кеше сөйгәненә акчалата ярдәм итәргә тиешме?
- Тиеш дип әйтмәс идем. Беркем дә беркемгә дә бернәрсә дә тиеш түгел. Әгәр ир-ат тели икән, ярдәм итсен. Хатын-кыз үзе үсәргә тиеш. Яраткан эшең белән шөгыльләнү һәм шул ук вакытта беркемгә дә бәйле булмау шәп бит ул.

- Сез гаиләдә ничә бала?
- Илшат исемле бертуган абыем бар.