Җан дуслар Гөлинә белән Зәринә: “Һәр яңа ел шушы теләкне әйтәбез”

Гөлинә шигырьләр яза, ә Зәринә шул шигырьләрне җыр итеп тамашачылар хозурына тәкъдим итә. Баксаң, кызлар сәхнәдә генә түгел, тормышта да якын дуслар икән.

- Сезнең дуслык ничек башланды?
Гөлинә: Безнең дуслык шигырьдән башланды. Зәринә минем социаль челтәрдәге төркемемә: “Исәнмесез, сез җырлар язасызмы, миңа да җыр язып бирә алмассызмы?” - дип сорап язды. Мин: “Әйе, язам. Хакы - 1 мең. Сезгә кайсы көнгә кирәк”, - дип җавап биргәнмен.
Зәринә: Шул 1 мең сумны түләдем дә инде, хәзер бушка алам (көлә). Беренче җырыбыз “Хыялым” - Илнат Фархуллин көе, Гөлинә Шәйхи сүзләре. Менә шуннан соң, бергә иҗат итә башладык инде.

- Дуслык иҗатка комачауламыймы?
Зәринә: Бу үзеңнән тора инде. Бер көндә ызгышып, талашып таралышырга да мөмкин. Без дә алай булдыра алабыз, чөнки икебез дә иҗат кешеләре. Әмма әлегә мөнәсәбәтләребезне кадерләп, саклап тотабыз. Яхшы гына бара кебек. Дөрес, мин кайвакыт Гөлинәне иңнәреннән тотып, каршыма утыртып мәҗбүриләп җыр яздырам. Чөнки алай эшләмәсәм, Гөлинә илһам килгәнен көтә. Ә илһам, гадәттә, төнлә килә. Мин ул вакытта йоклыйм. Шуңа эштән соң очрашып, бергәләшеп утырып язабыз. 
Гөлинә: Чыннан да, иҗат процессы шулайрак бара. Дуслык комачауламый, ул ярдәм генә итә. Зәринә белән дус булгач, ул башка кешенең сүзен тыңламаска да мөмкин, әмма минем фикерләргә колак сала. Образлар буенча да фикер алышабыз. Мин, әлбәттә, аңа бәхет кенә телим. 

- Тиздән Яңа ел җитә, нинди теләкләрегез бар?
Гөлинә: Без инде берничә ел бер-беребезнең парлы булуын көтәбез. Дус кызлар гел: “Синең туеңда булсам иде”, - дип теләк тели. Шуңа мин дә киләсе елда бер-беребезнең туенда булырга язсын дим. 
Зәринә: Аллаһ барлык ялгызларны парлы итсен. Бәхетле, гаиләле булырга язсын. 
Гөлинә: Хатын-кызның төп миссиясе - гаиләле булу, шуңа күрә без, әлбәттә, бу хакта уйланабыз. Һәр яңа ел шушы теләкне әйтәбез.
Зәринә: Без инде аны теләп кенә түгел, кагәзьгә язып, яндырып, шәрабка атып эчеп тә карыйбыз. Әлегә кабул гына булмый.
Гөлинә: Ялгызлыктан да авыррак әйбер юк. Һәркем парлы булсын дигән теләктә калабыз.