“Әнием песиебезгә әтиемнең исемен кушты” яки популяр җырчыларыбыз йорт хайваннары тотамы?

Яраткан җырчыларыбыз исә кечкенә чакларында нинди хайваннар турында хыялланган? Йомшак дуслары булганмы? Хәзерге көндә өйләрендә йорт хайваннары яшиме? Барысын да белештек, хәзер сезгә дә сөйләрбез! 

Рөстәм Әсәдуллинның балачагында иң беренче йорт хайваны песи булган. “Әнием аңа әтием исемен кушты. Радик дип чакыргач, мәче дә, әти дә ашарга чыга иде”,– дип көлә җырчы. 

Әнвәр Нургалиевның исә кечкенә вакытында эте дә, мәчесе дә булган. “Хәзер йорт хайваннары юк, эт турында хыялланам, әмма ала алмыйбыз, кызганыч. Җимешемә дә, балаларыбызга да хайван йоны ярамый”,– дип бүлеште җырчы. 

Танылган җырлар авторы, хәзер үзе дә җырлаучы Давлян йорт хайваннарын тотмый. “Балачакта авылда яшәгәч, сыер-сарыклар, үрдәк-тавыклар бар иде. Шул җитә калгандыр, мөгаен. Йорт хайваннарына артык исем китми”,–  дип елмая Илдус Дәүләнов. 

Балачагында Илнар Миранов кечкенә эт яки мини пиг турында хыялланган. Кызганыч, җырчының әлеге хыялы тормышка ашмаган. “Хәзерге көндә эт яки мәче аласым килә, тик мин өйдә бик сирәк булам. Ә йорт хайваннарына һәрвакыт игътибар һәм ярату кирәк. Үзләрен генә көне буена өйдә калдырып чыгып китәсем килми”,– ди җырчы.

Ландыш Нигъмәтҗанова, гомумән, йорт хайваннарын өйдә тотканны яратмый булып чыкты. “Мин аларны читтән генә яратам, өйдә исләре, йоннары ошап бетми, минем өчен чисталык беренче урында”,– дип елмая җырчы. 

Сиринә Зәйнетдиноваларның фатирында мәчеләр яшәгән. Җырчы кечкенә чагында әбиләренә җәйге каникулга кайткан чакта дүрт аяклы дусларын барысын да җыеп, үзе белән ала торган була. “3 ай буе яшәп, ияләнеп, әбиләрдә калалар иде”,– дип кызыклы хатирәсе бн бүлеште Сиринә!

Артур Исламов җәйләрен шулай ук авылда уздыра торган була, ә анда исә йорт хайваннары җитәрлек, ди ул. “Эт белән песидән тыш, абзар хайваннары – сыер, сарык, ат, кош-корт бар иде. Миңа шунысы да җиткәндер, күрәсең, өйдә хәзер хайван тоткан юк”, - ди Артур. 

Кечкенә вакытта Рафил Җәләлиев та, Эльмира Гыйльфанова да йорт хайваннары турында хыялланмаган. Гаилә башлыгы шаяртып: “Авылда барысы да бар иде: каз, үрдәк бибиләре, чеби сакладык, сыер, ат булды”,– ди. Студент вакытында Рафил юлда йорт куянына тап булуын да сөйләп узды. “Авыл кырыенда утырып тора, шүрләп кенә алып кайттым. Буаз булып чыкты, 8-9 бала китерде. Шулай итеп берничә ел хәтта йорт куяннары да тоткан идек”,– дип елмая ул.