Әнвәр Нургалиев: “Эчтән елыйсың, тыштан җырлыйсың...”

«2021 елның 17 гыйнварында минем әтием китеп барган иде. Бүген Дианабызның әтисе, кадерле Рәшит җизнәбез дә вафат булды. Авыр туфрагың җиңел булсын, җизнәм», – дип яза җырчы социаль челтәрдәге сәхифәсендә. Моннан ике ел элек җырчының якын туганы Диана Сәфәрова юл фаҗигасендә һәлак булды. Әнвәр Нургалиев белән хәбәргә чыгып, аның кайгысын уртаклаштык.

- Диананың балаларын әби-бабайлары карый иде дип беләбез. Балалар бабайлары вафатын ничек кичерде? Аларга бу хәбәрне әйтү кыен булгандыр?

- Шулай инде.  Балалар бабайларын бик ярата иде. “Ул әни янына очып киттеме, шуннан безнең арттан күзәтәчәкме?” - диделәр. Аиша (мәрхүмә Диананың олы кызы) әлегә сүзсез калды.

- Рәшит абый нинди кеше иде?

-  Рәшит җизни бик кунакчыл, хезмәт сөючән кеше иде. Йортын гел тәртиптә тотты. Маллар да тотты, бакчалары да бик матур иде. Техниканы күзен йомып та сүтеп-җыя алды, кулыннан эш килде, булдыра алмаган эше булмады. Рәшит җизни апама хәтта сыер да саудырмады. Ике җизнәм дә миңа абыемнар кебек, дөресрәге, аннан да якынрак әле. Балаларны да, апаны да (Рәшит абыйның хәләле) калдыру юк инде. Бу минем бурычым.

- Җизнәгезнең әтиегез белән бер көнне вафат булуы да күңелне яралый...

- Әйе, җизнәм әтием белән бер көнне вафат булды. Әтинең вафатына менә 5 ел булды. Әнием Салман белән Сәиднең туган көнен дә бакыйлыкка күчте. Әтинең вафаты турында Уникста концертым башланыр алдыннан хәбәр килгән иде. Җизни белән дә хәлләр шулайрак булды. 18 гыйнвар концерт иде. Ул әле яңа программаның беренче көне. “Җизни өзелде”, - дигән хәбәрне алгач, бөтенләй нәрсә эшләргә белмичә, туктап калдым. Берни дә уйлап та тормадым, җимешемне (хәләле Ирина) кайтып алдым да, Чишмәгә чаптык. Җизнине моргка озаттык, шимбә көн булгач, дүшәмбе генә ярабыз диделәр. Беренче концертымны ничек куйганымны да хәтерләмим. Кичә концерт алдыннан озаттык, туган авылына алып кайтып җирләдек. Ә кичен тагын концерт. Башта мең төрле уй. Әйе, мин концертны күчерә дә ала идем, әмма тамашачы да төрле авыллардан, җыелып килгән. Тулы зал, мин ни йөзем белән аларга: “Концертны куймыйм”, - дип әйтим соң? Без болай да авыр заманда яшибез, көн дә кемнедер җирлибез. Ә тормыш дәвам итә, дәвам итәргә тиеш тә. Минем гаиләдә бу югалтулар 2019 елда Флүр абыйның вафатыннан соң башланды. Шуннан бирле әҗәл килә дә килә, эчтән елыйсың, тыштан җырлыйсың...