Дилә Нигъмәтуллина: “Әни дә юк, икенче канатны югалтасы килми”

Аның хәл-әхвәлен белешеп, Дилә белән җәһәт әңгәмә кордык. 

– Әтиегезнең хәле ничек?
– Әти әле дә хастаханәдә, тернәкләнү уза. Хәле күпкә яхшырак. Ул операцияне авыр кичерде. Кызганыч, тернәкләнүне дә өйдә генә уза алмый. Операциядән соң, әти болай да бер ай хастаханәдә булды. Без Булат белән аны чиратлап карадык. Хәзер өченче операция көтелә, шуңа әзерләнергә кирәк.

– Җәүдәт абый гел көтмәгәндә авырып киткән кебек булды. Сез үзегез ни хәлдә?
– Без әтине хастаханәгә бүтән проблема буенча тикшерергә алып килгән идек. Аның анализлары начар булгач, табиб тулысынча тикшеренергә киңәш итте. Бары тик колоноскопия (эчәкләрне тикшерү) узгач кына, әтинең яман шеш булуы ачыкланды. Ярый әле вакытында ачыклый алдылар. Метастазлар юк диделәр. Без операция җиңел узар дип уйладык, әмма барысы да без уйлаганча гына булмый шул. Әти сөйләшми, кешеләрне танымый башлады. Ул вакытлар бик кыен булды. Күңел әллә нишләде. Хәзер әкрен-әкрен генә гадәти хәленә әйләнеп кайта, шөкер.

– Әниегез дә гүр иясе булгач, бу хәлләр сезнең гаиләне какшаткандыр?
– Әни дә юк, икенче канатны югалтасы килми. Ничә яшьтә булсак та, әти-әни исән вакытта без балалар әле. Барыбыз өчен дә стресс булды. Сәламәтлегенә зарланмаган әтиебез кисәк кенә биреште. Кулыбыздан килгәнне эшләргә тырышабыз. Әтине карап үзебез дә табибларга әйләнеп беттек. Шөкер, бу авыр мизгелләрдә мин ялгыз түгел. Гаиләм – терәгем. Өченче операциянең шифасы булсын иде. Әтине югалтудан куркам.