Дилә Нигъмәтуллина: “Абый белән сеңел” проекты ахыры якынлашкандыр..”

Булат һәм Дилә Нигъмәтуллиннарның абый-сеңел дуэты эстрадада иң озын гомерле дуэтларның берсе. Соңгы арада аларның уртак чыгыш ясаулары сизелерлек кимеде, шуңа язылучылар да үз борчуларын белдереп, Диләгә бу хакта сораулар юллый. 

- Бик күп сораулар килү сәбәпле мин бу темага ачыклык кертергә мәҗбүр булдым. Сез инде беләсез, 2025 ел минем өчен бик катлаулы булды, аның турында мин инде әйтеп киттем. Әмма бу әтинең хәленә генә бәйле әйбер түгел. Сүзем абый белән мөнәсәбәтләребез турында.  Мин бу хәбәрне әйткәч, төрле фикерләр булыр. Әмма алдан ук искәртеп китәсе килә, без бу темага абый белән бөтенләй сөйләшмәскә, ачыкламаска булдык. Арабызда нинди аңлашылмаучанлык булды? Нинди конфликт? Бу бары тик безнең арада калачак. Әлбәттә, без мондый карарга бер генә очрак, йә бер ел эчендә генә уйлап килмәдек. Ничек кенә авыр булмаса да, моның турында әйтергә мәҗбүрмен. Һәрбер нәрсәнең башы һәм ахыры булган кебек, безнең “Абый белән сеңел” проектының инде ахыры якынлашкандыр, - дип сөйли Дилә язылучыларына.

Бу язманың астында җырчы алдан әйтеп үткәнчә, фикерен белдерүчеләр күп. 
“Дилә, проект ахырына якынлашкандыр, әмма абый белән сеңел арасында элемтәне өзәргә ярамый. Сез уртак фикергә килерсез дип өметләнәм. Иң якын кешеләрнең бәхәсләшүе бик авыр хәл. Беркайчан да сезнең белән андый хәл булыр дип уйламадым. Барысы да яхшы итеп хәл ителсен”; “Дилә тормы булгач, төрле хәлләр була. Дүрт аяклы ат та абына. Барысы да җайланыр”, - дип язучылар бар.
Шул ук вакытта җырчыны шелтәләп: “Бу теманы сөйләргә теләмәгәч, ник кузгаттыгыз?” - дип тә язганнар.