#Шоу-бизнес 16 апрель 2024, 12:22

Дүртенче бала тапкан җырчы Лилия Хәйруллина: «Кызмы, малаймы соң - әлегә сер булып калсын...»

16 апрель 2024, 12:22

Лилия Хәйруллина белән хәбәргә чыгып яңалыкларын белештек.

Скопировать ссылку

Дүртенче бала тапкан җырчы Лилия Хәйруллина: «Кызмы, малаймы соң - әлегә сер булып калсын...»

Лилия Хәйруллина белән хәбәргә чыгып яңалыкларын белештек.

Татар эстрадасы җырчысы Лилия Хәйруллина дүртенче тапкыр әни булган! Лилия 2024 елның мартында Аргентинаның Буэнос-Айрес шәһәрендә бәби тапкан. Бу хакта ул социаль челтәрдәге язылучыларын хәбәр итте. Күптән түгел генә җырчы янәдән Казанга кайтты. Лилия Хәйруллина белән хәбәргә чыгып яңалыкларын белештек.
- Дүртенче тапкыр әни булуыгыз белән котлыйбыз, Лилия! Бу яңалык белән шаккаттырдыгыз!
- Шаккаттырырга яратам инде. 4 баланы тәрбияләү җиңел түгел. Аллаһ Тәгалә ничек язган инде, шуны кабул итәм. Йөкле булуымны белгәч, баланы Буэнос-Айреста табарга теләдем. Бала тугач, шул илнең граждан булып исәпләнә. Моның да үз сәбәпләре бар, бу хакта киң җәмәгатьчелеккә сөйләргә теләмим.

- Бу йөклелекне ничек кичердегез? Авыр булдымы?
- Дөресен генә әйткәндә, мораль яктан авыр булды. Чит илләрдә озак торганым булмады, бервакыт Америкада гына 4 ай яшәп алдым. Ә бу юлы туган яктан ерак булу йөклелек белән туры килде. Гармоннар да, хис-кичерешләр дә үзгәреп торды. Аргентинада сәламәтлек ягыннан авырлыклар булды, аларны сөйләргә батырлыгым җитми әле. Физик яктан бала тапканда гадәттән тыш авырлыклар булмады, шөкер. Бала табу ике сәгатькә сузылгандыр.

- 3 малайны Казанда таптыгыз, дип беләм. Ике илне чагыштырсак, кайда яхшырак?
- Аерма зур дип әйтмәс идем. Бала тудыру йорты да охшаш. Уңайлыклар ягыннан бернинди аермалар күрмәдем. Һәр хатын-кыз үзенә уңайлы бала тудыру йорты сайларга тиештер.

- Сабый бала белән самолетта кайту кыен булмадымы?
- Казанга бизнес-класс белән очтым. Анда урын да күбрәк, баланы үз яныңа яткызып та була. Бала ашыйсы килгәндә генә елап алды, тулаем алганда холыксызланмады.

- Кызмы, малаймы соң?
- Әлегә сер булып калсын. Гомумән, “малайлар булгач, кыз да алып кайтырга кирәк”, - дигән принципны аңламыйм. Иң мөһиме - бала сау-сәламәт булып үссен. Кыз теләп, малай туганнан кайгырып утыру да дөрес түгел. Ничек инде кәеф төшәргә мөмкин балаң булганда! Кемнәрдер, гомумән, балага уза алмыйлар. Аларга Аллаһ сабырлык бирсен.

- Дүртенче тапкыр йөкле булуыгызны белгәч, күңелдә нинди хисләр иде? Курыкмадыгызмы?
- Өченче тапкыр йөкле булуны белгәч тә, курыккан идем. Бала табу - җаваплылык бит. Дүртенче тапкыр йөкле булуны белгәч, еладым. Шатлык белән җаваплылык хисе берләште. “Баланы ничек табармын икән?” - дигән шикле уйлар булмады. Аллаһ Тәгалә биргән икән, димәк, баланы алып кайтырга көч табачакмын. Бала - ул бәхет, аны кабул итә белергә кирәк.

- Баланың әтисе белән аралашасызмы?
- Әлбәттә.

- Аргентинага бер үзегез бардыгызмы?
- Анда танышларым да бар иде. Баланың әтисе дә барды, әлбәттә. Бер үзем дә булдым, ялгыз да булмадым, төрле хәлләр баштан үтте. Сөйлисе әйбер күп, әлегә алар турында сөйләргә мораль яктан әзер түгелмен. Депрессия дә кичердем. Бу яңалыкны да куркып кына чыгардым. Шулай да, шатлык белән бүлешәсе, уртаклашасы килә бит.

- Баланың әтисе дә социаль челтәрләрдән читтә булачакмы?
- Гомумән, шәхси тормыш турында сөйләргә яратмыйм. Миңа алай тынычрак. Кайбер кешеләр бала тугач та, тизрәк социаль челтәрләрдә уртаклашалар. Шуңа күрә мине аңламаучылар да бар. Белмим, мин шәхси тормышны “шәхси” итеп саклау яклы.

- Шәхси тормышыгызга кагылышлы сораулар килеп тора. Сез төгәл җавап әйтмәгәч, имеш-мимешләр таралуга җирлек туа. Моны күңелегезгә якын алмыйсызмы?
- Бу һөнәрнең бер өлеше инде. Әгәр сине халык белә икән, әлбәттә, арттан сөйләп йөрүчеләр булачак. Аны туктатып булмаячак, шуңа күрә моңа салкын акыл белән карарга кирәк. Һәркемнең нәрсә әйткәненә колак салсаң, акылдан шашырга мөмкин. Имеш-мимешләргә җитди карамыйм, чөнки аларны таратучылар тормышымда нәрсә булганын белми. Яманлап сөйләрлек бернәрсә эшләмәдем әле. Элегрәк образларга кагылышлы каршылыклы фикерләр булды инде, бу нормаль күренеш. Бала табу - бик җаваплы вакыйга. Бу хакта начар сүзләр сөйләү, гомумән, сәер кебек. Танылган шәхесләр турында мәгълүмат тамашачы өчен кызыклы, әлбәттә. Шулай да һәр балам төрле ирдән булса да, миңа беркем бернәрсә әйтә алмый. Һәркемнең үз тормышы. Язмыш шундый, нишләтәсең? Үзем дә беркайчан беркемне дә гаепләмим, барысына тыныч карыйм.

- Балаларыгыз гаиләнең яңа әгъзасына нинди мөнәсәбәттә?
- Балалар бик шатландылар. Араларында көнләшү юк, шөкер.

- Хәзер Казанда төпләнәчәксезме?
- Барысы да чагыштырып карагач күренә диләр бит. Чит илдә яшәп алганнан соң, безнең шәһәрдән дә яхшырак җир булмавына тагын бер кат инандым. Кеше бит барыбер чит илгә барырга кызыга, каядыр омтыла. Үзебезнең милләттәшләр арасында яшәү - үзе бер бәхет икән. Бик сагынып кайттым. Булганына шөкер итә белергә кирәк. Дөресен генә әйткәндә, Аргентинаның экономикасы тотрыклы түгел. Анда яшәвем тарихи вакытка туры килде, илдә президент алышынды. Инфляция зур, товарларның хакы бер көн эчендә үзгәреп тора ала. Күрмәгәнне күреп кайттым инде. Туган җирдә яшәү рәхәтрәк. Монда кайткач, күңел тыныч.

- Иҗатыгызны үстерергә исәп бармы әллә үзегезне бала тәрбияләүгә багышлыйсызмы?
- Барысына да җитешергә тырышам. Иҗатны ташлыйсым килми, чөнки бу тормышымның аерылгысыз өлеше. Яңа җырлар бар, аларны халыкка җиткерергә кирәк. Иҗатыма битараф булмаганнарны яңа җырлар белән шатландырасым килә.

Җырчыны сөенечле яңалыгы белән котлыйбыз! Сау-сәламәт бала булып үссен!

Кызыклы яңалыкларны күзәтеп бару өчен безнең МАХ каналына кушылыгыз.