Фирүзә гаиләсендә кайгы: "Машинаңа күтәрелеп карый да алмыйм..."

4 июнь көнне җырчының әтисе Рафил абый мәрхүм булган. “Әти хәл юклыкка зарланды. Авылдан (Актаныш районы Татар Ямалы авылы) минем белән хушлашырга дип килгән иде. Казанда вафат булды. Табиблар йөрәк диде”, - ди Фирүзә.

Фирүзә социаль челтәрдә әтисе турында болай дип язган: “Күзләрем бөтен җирдән сине генә эзли, әти. Өйдә тапмагач, ишегалдына чыгып китәм. Гөрләтеп яшелчә-җимеш үстергән бакчаңа чыгам – анда да юк; көннәр буе гаражыңда казына идең, анда барам – анда да юк... Табын әзерләгәч, “әти, ашарга чык”, - дип чакырмакчы булам, тик әти диюгә тукталып калам. Бугазыма төер тыгыла. Син беркайда юк. Юк, дөрес хәл түгелдер бу... 

Техниканы, машинаңны бик яраттың... Бәләкәй чакта, машина маена батып кайтып керер идең дә, ул май исләре бөтен өйгә таралыр иде... Әти кайтты дип, сөенеп, кәефләрем күтәрелеп китәр иде. Әй, ул май исенең тәмлелеге... Мин ап-ак итеп юып куйган раковинада да ул кара майлар матур булып калыр иде дә, мин аны тагы ялтыратып юып куяр идем...

Син гармунда уйнап, күңелләрне дә юатып утыра идек бит әле. Гармуның да ятим тора. Бөтен әйбер сине хәтерләтә... Машинаңа күтәрелеп карый да алмыйм...

Сине саклап кала алмадым, гафу... Синсез тормышны күз алдына да китерә алмыйм. Тик мин ышанам, без әле синең белән очрашырбыз... Яратам сине...” – дип язган Фирүзә.

Рафил абыйга 67 яшь булган. Урыны оҗмах түрендә булсын. Фирүзәнең һәм якыннарының тирән кайгысын уртаклашабыз.