Гөлназ Солтанова: “Икеләнүләрем дә булды, аларга нокта куяр өчен проектта катнашырга булдым”

Гөлназ Эннио Морриконеның “Калиффа” фильмындагы җырын башкарды. 

- “Голос” проектында катнашу - хыялым дип әйткәнсез. Шулай да проектта катнашырга кем этәрде?
- “Голос” проектын беренче сезоннан ук карап барам. Динә Гарипова өчен җанаттым, хәтта аның өчен тавыш та биргән идем. Аның җиңүен бик теләгән идем. Үземнең дә “Голос” проектында катнашып карыйсым килде. Таныш-белешләр дә: “Сина анда катнашырга кирәк”, - дип әйтә иде. Шулай итеп, сольный концертларымны куеп, бераз мәшәкатьләрдән арынгач, көзен сайлап алу этабына бардым.Мине  проектның музыкаль продюсеры Юрий Аксюта тыңлады. Эфирда җырлаган җырымны башкарган идем. Икенче җырымда бераз каушадым, аннан Юрий Аксюта татар җырын башкарырга сорады. Башта: “Без сезне алабыз”, - диделәр. Аннан тынлык. Нәтиҗәдә мине чыгыш ясарга чакырдылар.

- Сезне өч жюри әгъзасы үз командасына чакырды. Ни өчен нәкъ Илдар Абдразаковны сайларга булдыгыз?
- “Берсе булса да сайлап алсын иде”, - дип теләгән идем. Гомумән, өч кеше мине үз командасында күрергә теләвенә шаккаттым. Бераз югалып та калдым. Дөрес, минем остаз итеп ир-атны күрәсе килде. Башта Владимир Пресняковка барырмын дип уйлаган идем. Аның иҗатын, җырларын бик яратам. Ләкин сәхнәдә басып торганда эчке тоемлавым Илдар Абдразаковны сайларга кушты. Ул дөньякүләм танылган җырчы, шуңа күрә аннан күп нәрсәгә өйрәнермен дип уйлыйм Моңа өстәп, Илдар тумышы белән Башкортстаннан, уртак телне тиз табарбыз дип уйлыйм. Минем махсус опера җырларын башкарганым булмады. Бу юнәлештә Илдарның тәҗрибәсе зур. 

- Җырчы өчен мондый бәйгеләрдә катнашу кирәкме?
- Башка җырчылар өчен җавап бирә алмыйм. Әмма минем өчен бу - үземне сынап карау. Гомумән, иҗатыма, үземә бик таләпчән карыйм. Икеләнүләрем дә булды, аларга нокта куяр өчен проектта катнашырга булдым. Бу адым, беренче чиратта, үзем өчен мөһим. Моннан тыш, үземне чиста татар җырчысы дип атый алмыйм, чөнки итальян, рус җырларын да яратып башкарам. 

- “Слепые прослушивания” этабында чит ил җырын башкардыгыз. Вокаль яктан бик авыр композиция. Дулкынлануны ничек җиңдегез?
- Дөрес, “Калиффа” җыры бик авыр. Өске ноталарны чиста ала алмый идем, шуңа вокал дәресләренә йөрдем, төрле остазлар белән эшләп карадым. Әлбәттә, дулкынландым. Бу тавышта да бераз сизелә. Әмма техник яктан төгәл башкару, хисләрне үз кулыма алырга булышты. 

- Гаиләгез дә сезнең белән булдымы? 
- Олы кызым булды. Ул Мәскәүдә 4 курста журналистика факультетында укый. Дусларым, якташларым да килде. Ә улларым Казанда калды. Алар мәктәптә укый әле. Алар минем төрле яктан үсеш алырга тырышуыма, урамда мине танучылар булганга күнекте.