Яшь җырчы, популяр көйләр авторы Радик Шәрәфиев әти булган!

Хәл-әхвәл белешү максатыннан Радик Шәрәфиев белән хәбәргә чыктык.

– Радик, котлыйм! Бәхетле, сау-сәламәт сабый булып үссен! Тормыш иптәшәң белән "партнерские роды"да булгансың икән. Үзең теләдеңме, әллә тормыш иптәшең кыстадымы?

– Әйе, безнең "партнерские роды" булды. Без нәрсә генә булса да, гел бергә инде. Башкача мөмкин дә түгел кебек, ничектер шулай өйрәндек, шатлыкны да, авырлыкны да бергә кичерәбез. Дөресен әйткәндә, "партнерские роды"ны Динара тәкъдим итте дә, ә мин каршы килмәдем.

– Ир-атның хатын-кыз бала тапканда янәшәдә булуы кирәкме? Ничек уйлыйсың?

– Минемчә, кирәк. Бала табу нинди авырлыклар белән бирелүен үз күзләрең белән күргәч, хатыныңа башка караш була башлый.

– Сабыйга нинди исем куштыгыз? Әти булу хисе пәйда булдымы әле?

– Сабыйга Тимур исеме куштык. Әлегә үземнең әти икәнемне чынлап аңлап бетерә алмыйм, ләкин хатыным балага узуга ук зур җаваплылык сизә башладым.

– Радик, хәзер үз төркемең белән авылларда йөрисең икән. Кыен түгелме?

– Һәр эш үзенчә авыр, җиңел эш юк. Ә иҗат ул үзем сайлаган юл. Фирдүс Тямаев төркеменнән киткәндә, барысын аңлап, әзер булып киттем, барлык авырлыкларны тормыш иптәшем, команда белән бергә чишеп барабыз. Сентябрьдә үземнең командамны җыеп төрле районнарга чыгып карадык, Аллаһка шөкер, олысы да, кечесе дә концертларыбызга килә. Шулай күп кешеләр безгә килер дип уйламаган идек, беренче ел өчен бу зур уңыш. Халыкны җыю авыррак, әлбәттә. Әмма мин бит хәзер үк тулы заллар көтмим, ниндидер хайп ясап, талашып, үзеңнең дәрәҗәңне төшереп, кеше алдап үзеңнең исемне күтәрү- минем юл түгел. Иҗатым белән кешенең күңеленә керәсем килә. Җырлар языла, үз өстемдә һәрвакыт эшлим, командам тугры, барысы да профессионаллар, иҗат итәбез, калганы киләчәк һәм халык кулында.

– Бу тырышлык үзен аклыймы соң?

– Әлбәттә, аклый. Артист буларак, гомумән, кеше буларак та үземдә зур үсеш күрәм, төрле кызык вакыйгалар килеп чыгып тора, бергәләп чишеп бару - тәҗрибә.