Илнат Фәрхуллин хәйрия концерты куйган: “Кулдан килгәнчә ярдәм итәргә тырышабыз”

Җырчы сүзләренчә, бу концерт бүген махсус хәрби операциядә булган егетләргә ярдәм йөзеннән оештырылган. 

“Тумышы белән Саба һәм Теләче якларыннан булган егетләргә кирәк-яраклар алып, үзебез аларга ярдәмембезне илтеп тапшырырга планлаштырабыз. Бу июнь айлары булыр. Ярдәм итә алганча, тырышам. Әлегә егетләргә дип машиналар алырлык мөмкинлегем юк, шуңа күрә концертта билетлар сатып эшләнгән акчалар белән булса да булышырга уйладым. Командамдагы егетләргә, кызларга рәхмәт. Теләчедә хәйрия концерт куйсак, ничек булыр икән, дигәч, алар тиз арада ризалышты”, - дип сөйләде җырчы.

Бу Илнатның беренче тапкыр хәйрия концерты куюы түгел. Ул үзе кычкырып сөйләп йөрмәсә дә, җырчы еш кына мөмкинлекләре чикле балалар янына да бара. Шулай ук Илнат шушы балаларгf акчалата да ярдәм итәргә тырыша. “Җомга саен ятим калган авыру балаларга күпме булса да хәер җибәрергә тырышам”,  - ди Фәрхуллин.

Шулай ук Илнат Теләче районы башлыгына, мәдәният бүлеге мөдирләренә үз рәхмәтен җиткерде. “Хәйрия концерты куябыз, дигәч, теләчеләр риза гына булды, яхшылап каршы алды. Концертка махсус хәрби операциягә улларын яки ирләрен озаткан тамашачы да килде”, - ди ул. 

Концерт карарга килгән тамашачы да нинди зур эш башкарган, димәк! Сүз уңаеннан, Илнат Саба егете булса да, балачагы Теләчедә үткән. Ул Иске Җөри авылында урнашкан интернат-мәктәптә укыган. Җырчы сүзләренчә, ул алга таба да хәйрия концертларын куярга планлаштыра. “Без барыбыз да бу дөньяга бер генә киләбез бит. Күпмегә килүебезне бер Аллаһ кына белә. Шуңа күрә кулдан килгәнчә ярдәм итик”, - дип йомгаклады сүзен Илнат.

Алинә Айдарова