Илназ Сафиуллин гаиләсе турында 10 факт

Бу хакта ул социаль челтәрдәге шәхси сәхифәсендә язды. Билгеле булганча, Сафиуллиннар гаиләсе Дубайда яши.

1 факт.

Ирем миңа үзенең хатыны буларак хезмәт хакы түли. Әгәр Илназның кайбер айларда эшләре аеруча яхшы булса, минем хезмәт хакына да премия өстәлә.

2 факт.

Элек безнең гаиләдә ирем ашарга пешерми иде. Әмма бер тапкыр Илназ балык пешерде. Шундый тәмле килеп чыкты ки, хәзер иремнең үзенең яратып пешерә торган ризыгы бар.

3 факт.

Ирем белән футбол матчларын калдырмыйбыз. Гадәттә, пабка барып карыйбыз. Эмоцияләрне тыймыйча, ихлас җан атабыз.

4 факт.

Кызыбыз Алиланы тенниска бирү Илназның идеясе иде. Иремә аның белән яна. Һәр тренировкага баланы үзе алып бара, күзәтә. Әгәр нәрсәдер килеп чыкмаса, кызыбыз өчен борчыла. Аның уңышка ирешүенә ышана.

5 факт.

Без шундый төрле булып тоелсак та, бер-беребезгә бик охшаган. Мәсәлән, эшләп арсак, аз ял итсәк, баланы мәктәпкә илткәннән соң, өйгә кайтып, бар чаршауларны ябып, йокыбыз туйганчы йоклыйбыз.

6 факт.

Без бер-беребезнең телефоннарыннан парольләрне беләбез. Тыныч кына ачып карый алабыз, әмма аның кирәге чыкмый. Шуңа без телефоннарны тикшермибез.

7 факт.

Икебез дә ял вакытында тик утыруны хупламыйбыз. Һәрвакыт актив ял итүне күздә тотабыз. Сәяхәтләрне, гадәттә, ниндидер вакыйга яки концерт белән туры китерергә тырышабыз.

8 факт.

Ял көннәрендә кызыбыз Алила безне уятмый. Мәктәпкә барырга кирәк булмаганда ул үзенә иртәнге аш әзерли: бутерброд, яшелчә салаты яки йогурт. Безнең йокыдан уянуны тыныч кына көтә.

9 факт.

Мин өйдәге җылы мохит өчен, ә ирем клининг өчен җавап бирә. Илназ үзе клининг чакырта һәм түли. Шуңа күрә өйдәге чисталык та өлешчә аның җаваплылыгында.

10 факт.

Без ким дигәндә атнага бер тапкыр свидание оештырабыз. Без әти-әни генә түгел, ир белән хатын да. Сүз уңаеннан, икебез дә интроверт.

Айгөл Хуҗина шулай ук ире белән танышу тарихын да сөйләгән.

Илназ белән танышып, аралаша башлагач, бу хакта әнигә әйттем. Илназ Сафиуллин дигән җырчы белән очрашам, дидем. Ул шунда ук каршы килде. Чөнки безнең яшь арабыз зур булуын белә иде. Илназ миннән 11 яшькә зур. Ул миңа: "Аның гаиләсе бардыр, син бу хакта белмисең генә. Кулланачак та, ташлап китәчәк.

Балалары бардыр, дип әйтә башлады. Ләкин мин үземнең интуициямә таяндым, булачак ирем белән аралашуымны дәвам иттем һәм дөрес эшләдем дип уйлыйм. Аның белән очрашканда әти-әниләремне: Дус кыз белән очрашам, дип алдарга туры килде.

Көннәрдән беркөнне Илназ минем әти-әниләрем белән танышырга теләк белдерде, мине дә үзенекеләр белән таныштырырга булды. Яңа елдан соң 26 гыйнвар көнне без Чаллыга, әти-әниләрем янына кайттык.

Әни безне матур өстәлләр корып каршы алды. Илназ белән шәхсән танышкач, аның миңа карата җитди мөнәсәбәтен күргәч, ул безнең бергә булуыбызга куш куллап ризалашты.

Кем белән булсаң бул, ләкин Илназ белән бул, диде. Шул вакыттан әни Илназны бик ярата. Кайвакыт, миңа караганда да ныграк ярата сыман тоела.

Хәзер мин дә кыз бала тәрбиялим, шуңа әнинең борчылуын да аңлыйм.

Әлбәттә, мине дә кызымның кем белән очрашуы кызыксындырачак. Шулай да, иң мөһиме балага лаеклы тәрбия бирү, дөрес үрнәк күрсәтү. Шул очракта барысы да яхшы булачак, дип сөйли Айгөл.