#Шоу-бизнес 04 гыйнвар 2026, 14:11

Иркәнең кызы Айсылу: «Әнигә бик зур рәхмәт, ул минем теләгемә каршы килмәде...»

04 гыйнвар 2026, 14:11

Татарстаның атказанган артисты Иркәнең олы кызы Айсылуны тамашачылар еш күрә. Айсылу төркемдә оештыру эшләре белән булыша, моннан тыш, аның тагын берничә эш урыны бар икән.

Скопировать ссылку

Иркәнең кызы Айсылу: «Әнигә бик зур рәхмәт, ул минем теләгемә каршы килмәде...»

– Айсылу, укуыңны уңышлы тәмамладың дип беләм. Хәзер кайда эшлисең?
– Мин “Халыкара туризм” юнәлеше буенча укыдым. Хәзер турагент булып эшлим. Концертлар оештыру белән шөгыльләнгәч, көн саен офиска барып, компьютерда эшләү беренче вакытта кыенрак булды. Тизлеккә, бик күп сорауларны бервакытта хәл итәргә күнеккәнмен икән. Хәзер, шөкер, бу эшкә дә күнектем. Укыган һөнәрем буенча эшлим.

– Хәзер күпләр алган һөнәрләре буенча эшләп тормый. Син дә концертлар оештыру белән генә шөгыльләнә ала идең бит...
– Әйе. Ләкин укыгач, үз һөнәрең буенча эшләп карарга кирәктер. Алган белемнәрне көндәлек тормышта кулланып карыйсым килде. Мин юкка гына белем алмадым бит.

– Син үзең генә яшисең бугай?
– Ике ел үзем генә яшәдем. Җаваплылыкка, мөстәкыйльлеккә өйрәндем. Әти-әнидән читтә һәркем яшәп карарга тиештер. Аерым яшәү күп нәрсәгә күзләрне ача. Әнигә бик зур рәхмәт, ул минем теләгемә каршы килмәде. Бу тәҗрибә безнең мөнәсәбәтләрне тагын да якынайтты. Дөрес, әти-әни белән яшәсәң, акчаң күбрәк янга кала икән (көлә).

– Шәхси тормышыңда яңалыклар бармы?
– Әлегә сөйгән ярым юк. Дөресен әйткәндә, хәзер үземне тулысынча эшкә һәм якыннарыма багышлыйм. Турагент булып эшләүдән тыш, әнигә дә ярдәм итәм, чәчәк кибетендә дә эшлим, испан теле дәресләре дә алып барам. Эш булып торсын, иң мөһиме – сәламәтлегебез какшамасын.

– “Җырчы, танылган кешеләрнең балаларына эшләмәсә дә ярый”, – дигән фикер бар. Сезнең гаиләдә, димәк, алай түгел?
– Ул алай булырга тиеш тә түгел. Әни шундый үрләрне яулау өчен 20 ел эшләгән. Ә мин әзергә-бәзер тудым да, беттеме? Юк. Гомумән, әти-әнидән үзем хәл итә алмый торган мәсьәләләр буенча гына ярдәм сорыйм. “Миңа алып бирегез”, – дигән җөмләне мин дә, сеңелләрем дә кулланмыйбыз.

– Ә әти-әнисе хисабына яшәүчеләр турында нәрсә уйлыйсың? Андый кешеләр белән аралашасыңмы?
– Мин бөтен кеше белән дә аралашам. Төрле кешеләр, төрле карашлар, фикерләр тыңларга яратам. Бу дөньяга, тормышка карашны киңәйтә. Әйе, әти-әниләре хисабына яшәүче танышларым бар. Әмма мин аларга каршы бер сүз дә әйтмим. Бу бит аларның тормышы. Шәхсән мин өйдә тик утыра алмыйм. Миңа гел нәрсәдер эшләргә кирәк, холкым шундый. Сүз уңаеннан, бу елның символы – ат. Мин дә ат елында тудым. Хәерле еллар булсын. Ат һәркемгә уңыш кына алып килсен

Кызыклы яңалыкларны күзәтеп бару өчен безнең МАХ каналына кушылыгыз.