Лилия Гыйматдинова: «Төп эшем – декрет ялы»

- Лилия, син, һөнәрең буенча, архитектор. Бу «престиж»лы эшеңне калдырып, нигә сәнгать дөньясына керергә булдың?
- Җыр өлкәсендә мин кечкенәдән кайныйм. Балалар бакчасына йөргәндә үк бәйрәм саен җырлаталар иде. Мәктәптә дә һәр бәйрәмдә катнашырга туры килде. Шәһәр Сабан туйларында җырлап йөрдем. Институтка кергәч, «Беренче курслар бәйрәме», «Студентлар язы» кебек фестивальләрдә дә үземне күрсәтергә мөмкинлекләр чыгып торды.

- Җырлау синең яраткан шөгылең генә мени?
- Ул вакытта хобби иде. Шуңа карамастан, бу шөгыль җаныма рәхәтлек бирә. Архитекторлыкка укырга кергәнемә бер дә үкенмим. Белемем белән горурланам.

- Эстрадага соңарып, гаилә корып, балалар тапкач кына килеп керү кыенлыклар тудырмадымы?
- Мин бу турыда уйламыйм. Язмыш мине эстрадага үзе шул вакытта алып килде. Биш ел элек җырчы булу турында, гомумән, уйламый идем. «Алтын барс» һәм «ТМТV» премиясе алырмын дип башка да килмәгән иде.

- Мәктәпне тәмамлагач, нигә сәнгать юлыннан китмичә, архитекторлыкка укырга кердең?
- Җырлаудан башка, рәсем-сызымнар ясарга бик ярата идем. 11нче сыйныфта укыганда, бу минем өчен мөһимрәк иде.

- Бер өлкәне бөтенләй капма‑каршы булган икенче өлкәгә алыштырырга нәрсә этәрде?
- 2013 елда тормышымда кү­ңелсез вакыйгалар булды. Ай ярым - хастаханәдә, ике ай өйдә ятарга туры килде. Шушы вакыйгадан соң эшкә чыгасым килмәде. Эш­тән киттем. Күңелем кабат җыр сәнгатенә тартты. Бер‑бер артлы өч җыр: «Әкият», «Янымда кал», «Ике ялкын»ны яздырдым. Аларның өчесе дә халык арасына тиз таралды, хит-парадларда алдынгы урыннарга чыкты.

- Сәнгать юлына керүеңне ирең ничек кабул итте?
- Ул мине һәрвакыт аңлый һәм ярдәм итә. Сигез ел тату гомер итәбез. Ачуланышулар да булмый түгел. Идеаль хатын булмасам да, үземчә бик тырышам. Ерак гастрольләргә чыгарга ризалык биргәнче, иң элек ирем белән сөйләшәм. Балаларны да күбесенчә ул карый. Әбиләре, апалары да булыша. Шулай да өйдән бер‑ике көннән озаккарак киткәнем юк.

- Бүген төп эшең кайда?
- Өйдә! Декретта бит мин. Кечкенә улым Рамилгә бер яшь тә ун ай гына әле. Олысы Ренат беренче сыйныфта укый.

- Пиар өчен нинди адымга бармас идең?
- Минем өчен беренче урында - гаилә. Үземә, гаиләмә, сәламәтлеккә зыян китерә торган тәкъдимнәрдән баш тартам.

- Лилия, фигураңа карасаң, сине бер дә ашамый, ахры, дип уйларга була...
- Икенче улымны тапкач, 10 килога арткан идем. Бер елдан соң баланы имезми башлагач, кинәт ябыктым. Фитнес һәм дөрес туклану да ярдәм итте. Хәзер авырлыгым - 49 кило.

- Лилия, гаиләң белән дә таныштырып үт әле.
- Ирем минем кебек үк архитектура һәм төзелеш университетын тәмамлады. Архитектура-проектлау фирмасында баш инженер булып эшли. Әтием бүлмә ишек­ләре кую фирмасында хезмәт куя. Әнием мәктәпкәчә яшьтәге балаларга белем бирү идарәсендә эшли. Чаллыда яшиләр. Гөлназ исемле апам да автокалада. Сеңлем Алия Казанда төпләнде.

^{Фотолар: vk.com}