Нәфисә Хәйруллина: «Яраткан кешең булса, аны гомер буе да көтеп буладыр.»

Нәфисә Хәйруллина белән хәбәргә чыгып, хәл-әхвәлен белештек.

– Яңа спектакльдә Луиза ролен башкарачаксыз. Үзегез Луиза Салиаскарованы хатын-кыз идеалы итеп күрәсезме?
– Луиза минем өчен татар хатын-кызының эталоны. Аның биографиясен өйрәнгәндә, үзем белән бик күп охшашлыклар таптым. Дөрес, Луиза Салиаскарова кебек кан бирә алмас идем. Мин моны психологик яктан кичерә алмыйм. Тулаем, мин дә үземнең иремне көтәр идем. Аллаһ сакласын, мондый хәлдә калырга язмасын. Ирем булмаганда да, озак вакыт ялгыз идем. Беркемне дә үземә якын китермәдем. Яраткан кешең булса, аны гомер буе да көтеп буладыр.

– Ни өчен Тинчурин театры? Сез иң беренче Камалга кайтырсыз кебек тоелган иде...
– Мине театрның баш режиссеры Айдар Җаббаров чакырды. Аны бик хөрмәт итәм, сәләтенә сокланам. Уйлап та тормадым, ризалаштым.

– 9 ел декретта утырдым дип әйтәсез. Әни ролендә генә каласы килмиме?
– Әлбәттә, балам, ирем минем өчен иң кадерле кешеләр. Шулай да һөнәремне, эшемне дә бик яратам. Гаилә корганчы да үземнең тормышымны иҗатсыз күз алдына китерә алмадым. Хәзер сәхнәгә кайтуым, дөресен әйткәндә, үзем өчен генә түгел. Баламның минем нәрсә белән шөгыльләнгәнен аңлавын, горурланып каравын телим.

– Хәзер Казанда яшиячәксезме?
– Юк, репетицияләргә генә кайтачакмын. Спектакльне чыгаргач та, билгеле, Казанга кайтып, китеп торасы була.

– Яңа ролегез сезнең күңел халәтенә охшашмы?
– Әйе, охшаш. Минем тормышымда да югалтулар күп булды. Балачакта әниемне югалттым. Әнинең сеңлесе тәрбияләп үстерде. Берникадәр вакытка ул миңа әти-әнине алыштырды. Аннан ул да бакыйлыкка күчте. Мин Уфада гастрольләрдә идем. Кайтып, хушлашып килергә куштылар. Мәйсәрә апа белән хушлашырга җитешмәдем, чөнки спектакль уйнарга кирәк иде. Фәрит Рәфкатович мине алыштырмады. Бәлки, бу сүзләр бик дорфа яңгырыйдыр. Ләкин Фәрит Рәфкатович моны начар ният белән эшләмәде. Мине трагедиядән тартып чыгару өчен, сәхнәгә чыгарды. Моның өчен бик рәхмәтлемен. Театр минем өчен коткару боҗрасы булды. Луиза Салиаскорва да һөнәренә карата шундый мөнәсәбәттә булгандыр.