Рафил Җәләлиев: “Безнең ял итү – елга бер тапкыр чит илгә барып кайту” яки артистлар ничек итеп ял итә?

Татар эстрадасы артистлары исә ни рәвешле ял итә һәм, гомумән, ял итә беләме? Массаж, хамам, спа ише җирләргә еш йөриләрме? Барлык сорауларга да җавап таптык, җәмәгать, хәзер сезгә дә сөйлибез!

Беренче булып Фәридә-Алсу дуэтының темабызга карата фикере белән танышыйк. Алсу сүзләре буенча, иң шәп релакс ул –  яраткан хобби белән шөгыльләнү, үз кулларың белән матурлык тудыру һәм уңайлы, рәхәт шартлар булдырып, ял итү. “Спа, хамамнарны бик өнәп бетермим”,– ди җырчы. Фәридә исә тәмле ризык әзерләп, гаиләсе белән кич утырырга, тормыш иптәше белән саф һавада йөрергә ярата. “Атнага бер массаж турында да онытмыйм”,– ди ул.

“Гашыйклар көнендә бер-беребезгә бүләк ясап ел саен Зинира белән тайларча массажга барабыз, ә болай бу эшкә Айгизә кызыбызның кулы ята. Берәр тәмнүшкә алып бирәбез, дип юмаласак, безгә массаж ясап сөендерә”,– дип сөйли Рамазановлар гаиләсе.

“Без көн саен кешеләр белән эшлибез. Бу эмоциональ яктан бик нык арыта. Эштән кайткач, кайнар мунча керәбез дә, яңадан туган кебек булабыз. Үзебез акча түләп массаж спаларга йөрмибез, чөнки җыенып чыгып китәргә вакытыбыз юк”,– дип ассызыклый Гөлназ һәм Илсур Шәрипҗановлар.

Аиша рәхәтләнеп ял итү мизгелләрен зарыгып көтә булып чыкты. “Бала үстерү сәбәпле, бер елдан артык тиешле дәрәҗәдә йоклаганым юк. Иң беренче чиратта рәхәтләнеп йокымны туйдырыр идем. Шулай ук иртәдән кичкә кадәр спага барып, маникюр-педикюр ясатырга хыялланам. Диңгездә ял итүдән дә баш тартмас идем”,– дип җавабы белән бүлеште җырчы.

“Ял оештырырга вакытыбыз юк”,– дип сүзен башлады Рафил Җәләлиев. “Массаж, спаларга да йөрмибез. Безнең ял итү – елга бер тапкыр чит илгә барып кайту. Теләк булса, анда массаж да алып була”,– дип ассызыклый ул.

“Тормышның нинди вакыты булуга карамастан, үз-үзләрен карап, саклап йөрткән кешеләр бар бит ул, сокланам андыйларга.  Соңгы ике-өч елда гына үз-үземә бераз гына булса да вакыт бүлеп бирә башладым. Хамам, массажларга, матурлык салоннарына йөрмим. Минем өчен иң мөһиме, иң кирәге – мунча”,– ди Асылъяр. 

Ә менә Гөлүс Хабибрахманов бассейнга йөрергә ярата булып чыкты.“Анда мунча да, спорт залы да бар. Вакытымны файдалы уздырырга тырышам. Көнемнең 3-4 сәгате шуңа китә”,– дип сөйли җырчы.