Рифат Зарипов: “Яшь тә бара инде, гел сикереп-биеп кенә булмый...”

– 2025 ел ахырына якынлаша, нәтиҗәләр нинди?
– Бу ел башкалардан аерылып тора дип әйтмәс идем. Иң мөһиме – әти-әни, тормыш иптәше, балалар исән-сау. Быел тамашачылар артып китте, анысы куанычлы яңалык. Елдагыча булыр дигән идем. Өстәмә концерт сораучылар күп. Димәк, без дөрес юнәлештә барабыз.

– Җырчылар елда ниндидер хайп уйлап табалар. Сез быел нәрсә белән мактана аласыз?
– Мин хайп ясый торган кеше түгел. Ул бит кемгәдер килешә, ә кемгәдер бөтенләй килешми. Миңа, мәсәлән, ул килешми. Эшләп караганым да, эшләргә теләгем дә юк. Минем тамашачы да андый түгел бит. 

– Репертуарыгызда салмак җырлар артты кебек...
– Ел да 20 яңа җыр яздырабыз. Аның 2-3 салмак, калганнары дәртлерәк. Әмма мин җырны сайлаганда иң беренче сүзләргә игътибар итәм. “Чыктым аркылы күпер” сүзләр юк. Яшь тә бара инде, гел сикереп-биеп кенә булмый. Уйландыра торган җырларны да башкарасы килә.

– Рифат, сезнең “фигура”га ак көнчелек белән сокланып караучылар бармы?
– Бернинди диета тотканым да юк, махсус күнегүләр дә ясамыйм. Нәсел белән шулай яратылган, аны мин генә үзгәртә алмыйм. Ә көнчелекнең агы-карасы бармы икән? Көнчелек йә була, йә булмыйдыр. 

– Сезгә көнчелек хасмы?
– Анысын мин сездән сорарга тиеш инде. Сәхнәгә чыккач, тамашачылар  шунда ук кемнең нинди кеше икәнен тоеп ала. Күзгә карау да җитә. Аны сүз белән аңлатып булмый. Һәр кешенең үз энергетикасы бар бит.