Ришат Фазлыйәхмәтов фанаты белән дуэт яздырган

“Мин сине” дип аталган яңа дуэт җыр яздырган. Эстрада йолдызы белән түгел, үзенең фанаты белән! Ришат белән хәбәргә чыгып, яңа дуэты турында сөйләштек.

– Ришат, күптән дуэт яздырганың юк. Соңгы яздырган дуэтың кем белән моңа кадәр иде?
– Дуэтлар күп булды инде. Ландыш Нигъмәтҗанова, Алинә Даутова, Гүзәл Әхмәтова, Гөлдания апа Хәйруллина белән җырладык. Соңгы яздырган дуэт җыры Ильмира Нәгыймова белән иде бугай.

– Нишләптер, татар эстрадасы йолдызы белән җырларсың кебек тоелган иде. Дуэт җырлаган кыз турында сөйләп үт әле. Сез ничек таныштыгыз, гомумән? Һәм ничек дуэт яздырырга булдыгыз?
– Дуэт яздырган кызның исеме Олеся. Ул урыс кызы. Күптән минем белән җыр яздырырга хыялланган. Ул Эльмираның танышы, шуңа аннан: “Ришат белән дуэт яздырып булмасмы?” – дип сораган. Менә шуннан чыккан җыр бу. Олеся татар телендә сөйләшми, әмма җырлаганда сүзләрне дөрес итеп әйтә. Тырышты.

– Нишләп дуэт Тәтишка белән түгел? Көнләшмиме?
– Тәтишка белән дә дуэт яздырырга вакыт җитәр әле. Эльмира көнләшми, алар күптән таныш бит. Бер-беребезгә ышаныч һәм хөрмәт белән карыйбыз, шуңа күрә барысы да яхшы.

– Тагын кем белән дуэт яздырырга теләр идең?
– Әлегә дуэтлар җитеп торыр. Алга таба күз күрер әле.