“Халык яратып кабул итте”: Марат Яруллин дуэтының тарихы

Моңа өстәп Ринат – Маратның администраторы да әле. Очраклы гына күрешеп, Ринат Яруллин белән җәһәт әңгәмә кордык. 

– Марат белән дуэт җырыгыз бар. Бу җырны яздыру кемнең тәкъдиме иде?
– Минем яки Маратның гына идеясе дип аерып әйтеп булмый. Бу безнең уртак иҗат җимешебез. Халык яратып кабул итте, концертларда да бу җырны көтеп алалар. Икебез дә сыйфатлы җыр булсын дип тырыштык. Әлбәттә, Маратның бүгенге популярлыгы, танылуы аркасында җыр тиз таралды.

– Сез Маратның администраторы, якын дусты да. Оештыру эшләре белән шөгыльләнергә кыен түгелме?
– Иң мөһиме – мин Маратның бертуган абыйсы. Бу, һичшиксез, беренче урында. Әйе, нинди генә сорау булса да башта минем белән сөйләшәләр. Җырчы иҗат белән шөгыльләнергә тиеш. Оештыру эшләрен башка кешегә тапшырырга кирәк дип уйлыйм. Безнең очракта аның өчен мин җавап бирәм. Моны масаю дип кабул итмәгез. Иҗат гөрләп барсын, яңа җырлар язылсын өчен вакыт һәм игътибар кирәк. Аны ара-тирә генә эшләп булмый. 

– Сез дә иҗат кешесе бит. Оештыру эшләре туйдырмыймы?
– Арырга ярамый, шалтыраталар, кызыксыналар икән, куанырга кирәк. Телефонның бер дә шалтырамаган вакытлары булды, без моны үттек. Хәбәргә чыкканнар белән элемтәдә булырга тырышабыз. Кемдер хәлләр сорап шалтырата, сәлам әйтергә куша. Башкалар концертлар мәсьәләсе белән мөрәҗәгать итә. Җавапсыз калдырмаска тырышам. 

– Үзегез дә яхшы җырлыйсыз. Ләкин сез Маратның иҗатын беренче урынга куясыз кебек. Хакмы?
– Безнең бөтен гаиләбез иҗат белән бәйле. Әти җырчы, баянчы. Гомер буе мәдәният өлкәсендә хезмәт итте, бүген дә эшли. 22 ел районда мәдәният бүлеге җитәкчесе булып эшләде. Мин үзем өч яшьтән сәхнәдә. Сәхнәләр, билгеле, төрле иде: авыл мәдәният йорты, район клублары. Ә хәзер Татарстан, Башкорстан һәм башка төбәкләрнең зур залларында чыгыш ясыйбыз. Тамашачылар алкышлап каршы ала, озатып кала. Хәзер без Марат Яруллин проекты өстендә эшлибез. Әлбәттә, бер лидер булырга тиеш. Әлегә ул – Марат. Ә мин инде, һәрьяклап ярдәм итәргә тырышам. 

– Мондый абый булгач, рәхәттер инде. Чит-ят кеше түгел бит.
– Читтән кеше ялласаң, аңа акча да түләргә кирәк бит әле. Ә бу очракта анысы кирәкми (көлә). 

– Бушлай эшләтәме әллә?
– Төрле хәлләр булгандыр инде (көлә).