Җырчы Алсу Фазлыева: “Һәр сәфәрдә могҗизага тап булам”

Алсу Фазлыева белән сәфәр турында җәһәт әңгәмә кордык.

- Мөмкинлегем булган саен Согуд Гарәбстанына барырга тырышам. Ильмира белән бергә баруыбыз очраклы туры килде. Бер концертта очраштык та, ул үзенең шундый хыялы турында әйтте. Баксаң, аның шул көннәре буш та икән. Бик җиңел сәфәр булды. Күп нәрсәләрне күреп, инанып кайттык.

- Хаҗда могҗизалар күрәсең диләр. Сезнең белән дә алай булдымы?
- Беренче тапкыр баруымда ук, Аллаһның барлыгына инанып кайттым. Әйе, һәр сәфәрдә могҗизага тап булам, шуңа изге җиргә барасы килеп тора. Аның сихри тарту көче бар.

- Сез сәфәрдә булганда өй мәшәкатьләре Азат иңенә төшәме?
- Азатка әни дә ярдәм итә.  Без гаиләбез белән дә сәяхәт итәргә яратабыз. Ике ел рәттән Аргентина, Бразилиядә булдык, узган ел Көньяк Африка, Маврикийда булдык. Тагын ике илгә сәяхәт планлаштырабыз, әлегә әйтмим, сер булсын. 

- 2025 ел сезнең өчен уңышлы булдымы?
- Мин алдан ук: “Бу ел минеке булачак”, - дидем. Мин ел саен Яңа ел алдыннан елга планнар язып куям. 2025 ел булгач, 25 хыялымны яздым. Шушы хыялларымның 80 проценты үтәлде, шөкер. Хатын-кызлар күпвакыт үзләре турында онытып, гаилә өчен генә яши. Ә күз алдында төгәл планнар торгач, үзеңне кулга алырга җиңелрәк. Быел, Аллаһ бирса, 26 хыял язам. Төп теләгем - сәламәт булырга, гаиләм, якыннарым белән күбрәк вакыт үткәрергә.