Җырчы Илнат Фархуллин әти булачак: “Без бала көтәбез!”

Ду китереп биюче Регинаның болай саклануы нәрсә белән бәйле? Бу сорауны Илнат Фархуллинга юлладык. Ә ул безнең белән зур сөенече белән уртаклашты.

- Шатлыклы яңалыгыз бармы әллә Илнат? Сезне котласак буламы?
- Әйе, без бала көтәбез! 

- Чын күңелдән котлыйм! Регина бала көтәбез дигән хәбәрне ничек җиткерде сон?
- Көндезге бер мәҗлестән кайткач, ял итә идем. Регина ишектән башын тыкты да: "Без бәби көтәбез" – диде. Мин: "Ярар. Молодец"- дим. Аннан соң гына бу хәбәрне аңлап алдым. Сикереп тордым да, кочаклап алдым! Әзрәк башкача әйтсә була иде инде, үзе дә югалып калган. Иң мөһиме - без шат!

- Баланы планлаштырган идегезме?
- Планда бар иде, әлбәттә. Без бит әле яшь. Барысы да Аллаһ кулында, иң мөһиме - сау-сәламәт сабый булып тусын.

- Хәзер Регина ял итәме инде?
- Ял итәргә вакыт юк, гастрольләргә йөрибез. Безнең дуэт җырыбыз "Әкиятем"не халык бик җылы кабул итте. Хәзер дә шуны бергә концертта башкарабыз.  Биюен, әйе, туктатты.

- Бу хәбәрне балалар ничек кабул итте? 
- Балаларга әйттек, барысы да яхшы. Мин балаларның һәрберсен тигез күрергә тырышам. Усаллыгым да, яхшылыгым да җитә. Мин балаларны яратам бит. Алар мине. 

- Сез хәзер күпбалалы әти булачаксыз. Җаваплылык та арта...
- Мин үзем дә күп балалы гаиләдән. Җаваплылыкка әзер. Һәр бала үз ризыгы белән туа диләр. Иң мөһиме - сәламәт булсыннар. Калганын җиңеп чыгарбыз дип уйлыйм. 

Билгеле булганча, Татарстанда «Гаилә» илкүләм проекты гамәлгә ашырыла.