Җырчылар ялган сөйлиме: популяр артистлар дөреслек турында ничек уйлый?

Артистларга еш алдашырга туры киләме? Мөнәсәбәтләрне саклап калу өчен ялганлаганнары бармы? Кыскасы, безне кызыксындырган четерекле сорауларга җавап таптык, хәзер аларны сезгә дә тәкъдим итәбез.

— Соңга калганда «батып калдым» яки «бөкедә утырам» дип, һава торышына туры килгән, актуаль алдауларны кулланган бар. Ә кайбер кешеләр арасындагы мөнәсәбәтләрне саклап калу өчен ялганлауны начар күренеш дип санамыйм. Мәсәлән, ике дус бер-берсенә ачулы икән, аларның арасын җайлап җибәрү өчен ипләп кенә бераз алдалап җибәрүне хәтта савап дип саныйм, — ди Илсур Шәрипҗанов.

Җырчы шулай ук хайп темасына да фикерен белдерде.

— Булмаган әйберне дә булды дип, тамашачы санын арттыру өчен ялганлауны бик үк өнәп бетермим, — дип ассызыклый ул.

Раяз Фасыйхов гомерендә бер тапкыр да алдамаган кеше булмавына ышанмавын әйтте.

— Дусларыңны һәм яраткан кешеңне ялганлап йөрсәң, күңелең тыныч булмыйдыр ул. Барысы да ихлас булса, тормышта бөтен кешегә дә җиңелрәк, — ди җырчы.

— Шаяртулар, әлбәттә, була. Акыл өйрәтеп утырасым килми. Әмма ялган капчыкта ятмый, ул барыбер беленә һәм сиңа меңләтә зыян китерергә мөмкин, — дип тә искәртте Раяз Фасыйхов.

— Яшь чакта ешрак алдашырга туры килә иде. Әйтик, әти-әни орышмасын дип. Яшь бара-бара, балалар тугач, бөтенләй алдамаска булдым, — дип сүз алды Алсу Абульханова.

— Вак-төяк ситуацияләрдәге ялганны без куркыныч дип тапмыйбыз, ә нәкъ менә шундыйлардан зур, куркыныч алдаулар туа да инде. Ә ялганны мин бик яхшы сизеп алам: вакыт узган саен кешеләрне үтәли күрә башлыйсың икән, — дип елмайды җырчы.

Лилия Хаснулова да алдашырга яратмавын әйтте, әмма бер кызыклы хатирәсе белән уртаклашты.

— Миңа ун яшьләр чамасы булгандыр. Өйдә туп тибеп уйнаганда әнинең яраткан вазасын ваттым. Әни: «Кем эше бу?» — дип бик җитди караш белән сорагач, өч яшьлек сеңлем ватты дип әйттем. Янәсе, кечкенә балаларга барысын да кичерәләр бит, — дип сөйләде җырчы.

— Дөньясы ялган белән тулган, — дип искәртте Ризат Рамазанов. — Социаль челтәрләрне ачсаң да, бар кеше бәхетле кебек. Ә икәүдән-икәү калып сөйләшә башласаң, проблемалары бихисап, сөйләп туя алмыйлар.

Җырчы шулай ук дуслык мөнәсәбәтләрен саклап калу өчен хәйлә кулланган очракларын да искә алды.