Зөлфия Шакирова: “Ул көнне искә төшерү дә кыен. Беркемгә дә бала хәсрәтләрен күрсәтмәсен”

Искәндәр авария хакында журналистларга комментарийда: «Йөртүче яллап, машинага заказ биргән идек. Арткы утыргычта йоклап кайттым. Һәлакәттә безнең йөртүче гаепле. Ул барган җирдән йоклап киткән. Шул гына хәтеремдә: бик тиз бара башлагач, беренче машина белән бәрелгән тавыштан уянып киттем. Шунда янымдагы кызга: «Хәзер без үләбездер инде...» – дип әйтергә генә өлгердем. Нәтиҗәдә, башта 3 машина белән, азактан ягулык станциясенең реклама баганасына бәрелеп туктадык», – дип сөйләгән иде. Җырчының 9 кабыргасы сынган иде. Әлеге юл һәлакәте буенча тикшерү эшләре һаман дәвам итә. Ачыклык кертер өчен Зөлфия Шакирова белән элемтәгә чыктык. 
– Зөлфия ханым, юл һәлакәтенә ачыклык кертеп бетерә алдыгызмы әле?
– Бу вакыйганың очына чыгып җитә алмыйбыз. Һаман тикшерүләр бара, барысы да көн кебек ачык, югыйсә. Әмма әле дә нәтиҗәсе юк. Улыбызны үлемнән алып калдык. Аның янәшәсендә булган кызның әле дә кулы эшләми. Күпме операция ясатты бу балалар.
– Искәндәрнең хәлләре ничек?
–Үз аякларында йөри, Аллаһка шөкер. Иң мөһиме киләчәктә хәле начарланмасын инде, җәрәхәтләре төзәлеп бетсен дип теләп торабыз. Әмма артык авырлык күтәреп, иелеп эшли алмый. Кар чистартырга дип чыккан иде: “Булмый икән әле”, – дип керде. Искәндәрнең бигрәк тә йөрәк ягында кабыргалары сынган, үпкәләре кысылган иде. 
– Ялгышмасам, Искәндәр юл һәлакәтенә эләккән машинаның йөртүчесе сезнең күрше урамда гына тора. Гафу үтендеме?
– Бернинди гафу үтенү, хәл белү дә булмады. Әле ул Искәндәргә “үзегез гаепле”, – дип тә әйткән, бөтен сүзе шул. Машинада барганда артта утырган пассажирлар йокламыймы инде? 
– Юл һәлакәте турында белгәч, шунда ук юлга чыккансыздыр?
– Без бит бернәрсә дә белмәдек. Искәндәр дусларының машинасына утырып китте. Үз машинасы өйдә калды. “Утырып барасың, утырып кайтасың”, - дип әйттем. Искәндәр өйгә 12се кайтырга тиеш иде. Дустының йөргән кызына эшкә барасы булгач, 11е иртән юлга чыгарга туры килгән. Искәндәр дустының кызын: “Берүзен генә таксист белән җибәрмик”, – дип юлга чыккан. Искәндәр юлга чыккач, миңа хәбәр бирәсе булган, мин “онлайн”да булмагач, “әни уянмагандыр әле. Аны борчып тормыйм”, – дип язмаган. Безгә Алабуга хастаханәсеннән хәбәр килде. Улыгыз юл һәлакәтенә очрады, диделәр. Бөтен белгәнебез шул иде. Нәрсә булган? Исәнме ул? Бернәрсә белмәдек. Җыенып юлга чыктык. Җәвит белән бер-беребезгә бернәрсә әйтә алмадык, икебез дә сүзсез калдык. Башка нинди генә уйлар килмәде... Хәзер дә тынычланып булмый. Ул көнне искә төшерү дә кыен. Беркемгә дә бала хәсрәтләрен күрсәтмәсен. Яңа елда дөньялар тынычланып, барлык әти-әниләр газиз балалары белән исән-сау яшәсен иде. Якыннарыгыз янәшәдә булсын. 
Илгизә Галиуллина