#Сорау-җавап 27 сентябрь 2019, 12:18

Ана капиталына йорт алырга ярыймы?

27 сентябрь 2019, 12:18

Бездә шундыйрак хәл: минем биш балам бар, ике баласы белән бер кызым минем янда яши. Бу йортыбызны кызыма ана капиталы акчасына сатып, акчасын барлык балаларыма бүлеп бирсәм ярый микән? Чөнки алар һәрберсе йорттан үз өлешен алырга тели. Исемем редакция өчен генә.

Скопировать ссылку

– 256нчы Федераль канун нигезендә, ана капиталын торак шартларын яхшырту өчен тотарга була. Ягъни сез акчаны канун тарафыннан тыелмаган, торак белән бәйле барлык эшләргә файдалана аласыз. Торак яшәү өчен яраклы булырга тиеш. Әгәр дә ана капиталын алу хокукын биргән гаиләдәге икенче, өченче балага өч яшь тулмаган икән, ана капиталын торак өчен алынган кредитның төп өлешен каплау өчен тотарга була. Балага өч яшь тулганнан соң, ул акчаларга торак сатып алырга рөхсәт ителә. Кыскасы, сезнең кызыгыз ана капиталы акчасына йортыгызны сатып алырга хокуклы. Тик моның өчен торакны гаиләдәге барлык кешеләр исеменә гомуми милек итеп теркәргә кирәк. Ә акчаны ничек телисез шулай куллана алачаксыз, – дип аңлатты Казан шәһәре Киров районы пенсия бүлегендә социаль түләүләр төркеме җитәкчесе Лилия Печенкина.

Кызыклы яңалыкларны күзәтеп бару өчен безнең МАХ каналына кушылыгыз.