КАССА ЧЕГЫ: БИРЕРГӘМЕ-ЮКМЫ?

Күптән түгел Казан базарларының берсендә балык сатып алдым – карап торышка ашарга яраклы кебек, әмма өйдә бер тапкыр кисеп җибәрүгә үк «шартлады», чөнки газ белән тулган иде. Сатучы акчаны кайтарып бирүдән баш тартты: янәсе, сез бу балыкны миннән сатып алмадыгыз, мин сезне хәтерләмим. Касса чегы бөтен җирдә дә мәҗбүри түгелмени?
Р.Төхвәтуллин».

Әлеге сорауга ТР Дәүләт алкоголь инспекциясенең эчке базарны үстерү һәм координацияләү бүлеге башлыгы Розалия Арсланова җавап бирә:
– Владимир Путин «Россия Федерациясендә исәп-хисап ясаган вакытта контролькасса техникасын куллану хакында»гы Федераль законга үзгәрешләр кертү турында»гы Федераль канунны имзалады. Ул 2019 елның 6 июнендә үз көченә керде. Әлеге закон торак-коммуналь хуҗалык (ресурс белән тәэмин итү оешмалары хезмәтләрен дә кертеп), сак һәм куркынычсызлыкны тәэмин итү системалары, мәгариф өлкәсендә хезмәт күрсәткәндә контроль-касса техникасын куллануны гадиләштерүне күздә тота. Моннан тыш, кулланучыларга исәп-хисап ясый торган урыннан читтә урнашкан контроль-касса техникасын товарны дистанцион алым белән сатканда, берәр төрле эш башкарган урында һәм сәүдә объектыннан читтә хезмәт күрсәткән вакытта, шулай ук шофер яки кондуктор тарафыннан транспорт чарасы салонында исәп-хисап ясаганда, торак-коммуналь хезмәтләре өчен түләүләр кабул иткәндә файдалану хокукы бирелә. Әлеге очракларда касса чегы кәгазьгә чыгарылмаска, ә QR-кодны күрсәтеп тәкъдим ителергә мөмкин.

Федераль закон тарафыннан контроль-касса техникасы кулланылмый торган очракларга төгәллек кертелә. Әйтик, бахилларны әлеге техникадан башка гына сатарга мөмкин. Онлайн-режимында түләгәндә торак милекчеләре ширкәтләре, мәгариф, спорт һәм мәдәният оешмаларына; кулдан яки лотоктан театр билетлары саткан вакытта контроль-касса техникасыннан башка эшләргә рөхсәт ителә.