Машина төзәткәнне карап торырга ярыймы?

Дәүләт Алкоголь инспекциясенең Казан территориаль органы эчке базарны үстерү һәм координацияләү бүлеге хезмәткәрләре аңлатуынча, закон нигезендә, машинага үткәрелгән техник тикшерүне дә, ремонтны да үз күзләрегез белән карап торырга хакыгыз бар. Бары сервис хезмәткәрләренең эшенә комачауларга гына ярамый. Дөрес, сервис үзәге, куркынычсызлыкны күздә тотып, клиентка бүлмәдә утырып торырга тәкъдим итәргә бурычлы. 

Ремонтны күзәтеп тормасагыз да була. Иң мөһиме: машинаны кире тапшырганда, кабул итеп алу актын җентекләп тикшерегез. Бу документта машинаның нинди кыяфәттә тапшырылуы тасвирланган була. Ремонт вакытында автомобильгә ниндидер зыян килә икән, бу чыгымнарны сервис күтәрәчәк. Смета төзүне дә таләп итә аласыз. Еш кына сервис үзәкләрендә документта машинаның нәрсәсе ватык булуын һәм төзәтү өчен нәрсә эшләнгәне турында гына языла. Сметада исә һәр эшләгән эш турында тулы мәгълүмат күрсәтелә, һәр хезмәтнең бәясе конкрет языла. Машина ремонтланып беткәч, сервис үзәге хезмәткәре белән аны баштанаяк карап чыгарга кирәк. Килешүдә күрсәтелмәгән хезмәтләрне барларга, машинага зыян килмәгәнме икәнлеген ачыкларга киңәш ителә. Әгәр дә аңлашылмаучанлык килеп чыкса, сервис үз акчасына экспертиза уздырырга тиеш була. Сервис гаепле булып танылса, алар җитешсезлекләрне үз хисапларына төзәтергә бурычлы.