#Социаль тормыш 02 февраль 2015, 12:36

Инкассатор Сөләйман Ихсанов: «Беркайчан да күп акчага кызыкмадым»

02 февраль 2015, 12:36

Тормышыңны куркыныч астына куеп, кулыңда гомер буе салкын корал белән зур суммада акчалар йөртү зур батырлык ул. Ә инкассатор дигән һөнәр ияләре көн туган саен әнә шулай юлга кузгала. Сөләйман Ихсанов 39 ел шофер-инкассатор булып эшли. Соңгы арада Яшел Үзәндә булган вакыйгалар бу һөнәргә карата кызыксынуны тагын да арттырды. Безнең...

Скопировать ссылку

Инкассатор Сөләйман Ихсанов: «Беркайчан да күп акчага кызыкмадым»

- Сөләйман әфәнде, инкассатор итеп эшкә кемне кабул итәләр?

- Иң элек Эчке эшләр бүлеге аша тикшерү узасың, аннары сәламәт икәнлегеңне исбатлый торган медицина күзәтүе кирәк. Шулай ук армия хезмәтендә булып кайту мәҗбүри.

- Эш сәгате ничек башлана һәм ул күпмегә сузыла?

- Без ике смена эшлибез. Беренчесе иртәнге сәгать сигездән кичке бишкә кадәр булса, икенчесе төнге берләргә хәтле сузыла. Көн саен наркоглог күзәтүе узабыз. Машина һәрвакыт төзек булырга тиеш.

- Зур суммада акчалар йөртәсездер. Их, шушы акчаның беразы гына булса да үземә булса иде, дигән уйлар башка кермәдеме?

- Юк, мин беркайчан да кеше акчасына кызыкмадым.

- Һөҗүм итәрләр дип курыкмыйсызмы?

- Баштарак курку булса да, аннары ияләшәсең. Бик күп акча йөрткәндә берничә инкассатор машинасы озата барырга тиеш.

- Яшел Үзәндә инкассаторның банк акчасын алып качулары турында хезмәттәшләрегез белән дә фикерләшкәнсездер...

- Бу башка сыймый торган акылсызлык. Мин аларны якламыйм. Аннары, ул акчаның барыбер рәхәтен күрмисең бит. Иптәшеңә ату үзе тагын нинди зур җинаять.

- Хезмәт хакларының аз булуы җинаятькә этәрергә мөмкинме икән?

- Юк, бу сәбәп була алмый. Инкассаторларга хезмәт хакын һәрчак вакытында, башка хезмәт кешесеннән күбрәк түләделәр. Безгә җитте бит. Балалар да үстердек, йортын да салдык.

- Балаларыгыз да сезнең һөнәргә кызыкмадымы?

- Без элек банк ишегалдында яшәгәнлектән, кызыбыз Лилия анда эшкә йөрүчеләрне күреп үсте. Ул башта банк мәктәбен, аннары институт тәмамлады. Хәзерге вакытта банкта эшли. Улыбыз Ленар - автомеханик.

- Сез күп кенә Мактау кәгазләренә ия булгансыз. Быел үзегезгә Татарстандагы инкассация идарәсенә 70 ел тулу уңаеннан медаль дә тапшырганнар. Сезнең сукмактан баручы яшьләргә нәрсә әйтер идегез?

- Сиңа ышанып шундый җаваплы эшне тапшырганнар икән, ул ышанычны акларга кирәк. Һөнәр сайлаганчы, яшьләр башта уйлансыннар иде.

^{Автор фотосы}

Кызыклы яңалыкларны күзәтеп бару өчен безнең МАХ каналына кушылыгыз.

#250