«Иртүк сәгать 5 тә торып тагын эшкә», яки бер гаиләгә - ике чемпион!

Килгән саен, якын итеп күрешәбез. Кайчак яртылаш кына тулы залның да яртысын көрәшеп чыккан егетләр, аларның вәкилләре алып тора. Шундый чакларда гаиләләре белән җан атарга килүчеләргә аерым игътибар бирәм мин. Алар көрәш чараларына ничектер җанлылык, ямь өсти. Бүген, мәсәлән, бертуган чемпионнар Ренас һәм Рафаэль Кәлимуллиннарның Менделеевск районы Камай авылыннан хәтле әти-әниләре - Әлфинә апа белән Рәмис абый килгән иде. Иртәдән бергә утырдык. Яз, эшнең дә кызган һәм муеннан чагы бит әле. 
- Йөрәк түзәмени инде... Рәмис абыең иртәнге сәгать 8 дә эштән кайтты да, җыен, диде. Ярты сәгать эчендә оешып, Казанга чыгып киттек, - ди Әлфинә апа. 

Нинди генә көчле көрәшчеләр булсалар да, җиңүләренә ышанып торсак та, ата-ана, горурлык хисе белән бергә, балалары өчен бик борчылып, ут йотып тора шул...
- Балалар көрәшеп, җиңеп чыкмыйча, күңел тынычлана алмый. Имгәнмәсеннәр дип тә йөрәк бетә. Ренас өчен тынычрак әле без. Рафаэль өчен күбрәк борчылабыз, - ди Әлфинә апа. Шундый зур чемпионатларда 9-10 чемпионның икесе бер гаилә уллары - аларның балалары булу зур горурлык инде.

Әлфинә апа һәм Рәмис абый белән авыл тормышы турында да сөйләшеп утырдык. Барыбыз да көрәш дип янсак та, дөнья көрәш тирәсендә генә әйләнми бит әле:). Фермер буларак, мал тотуның плюсы-минуслары, сөт бәяләренең тагын түбән төшүе кебек темаларны да кузгатып алдык. Барыбыз да авыл балалары, якын һәм таныш проблемалар. 

Ике уллары җиңеп, чемпионнарның кубок һәм медаль алганын күреп, тынычлангач, Әлфинә апа белән Рәмис абый төнгә каршы авылларына кайтып та киттеләр. Якын ара түгел. Яңгыр, караңгы. Юлга чыккан һәркемгә хәерле юллар булсын! 
- Ник кунача калмыйсыз инде? - дигән идем. "Иртүк сәгать 5 тә торып тагын эшкә. Нинди куну..." - ди Рәмис абый. Безгә ял булгач, онытылып та киткән. Колхозда, фермерлыкта ял да, отпуск та юк шул... 

Лилия ЙОСЫПОВА.