Чаңгы узышлары Ватан сакчысы елына багышлана

Казанда спорт чарасы 4 мәйданда оештырыла. Болар: Юдино бистәсендәге “Локомотив” стадионы, Горки-Әмәт урман паркы, Дәрвишләр бистәсендәге Каенлык, шулай ук Яңа Савин районында Гаврилов урамында Казансу буе исәптә тотыла.

Бу турыда “Татар-информ” мәгълүмат агентлыгында узган матбугат конференциясендә белдерелде.

– Татарстанда “Россия чаңгы юллары” спорт чарасында ел саен 100 мең кеше катнаша, ул елдан-ел абруй казана бара. Шәһәр Башкарма комитетының спорт комитеты башлангычында быел Казанда чаңгы йөреше мәйданнарында “Ватан сакчысы елы” шигарендә дә узышлар үткәреләчәк. Әлеге чаңгы стартына  махсус хәрби операциядә катнашкан кешеләр, хәрбиләр, курсантлар басачак, – диде республиканың спорт министры урынбасары Илдар Садриев.

Казан шәһәр Башкарма комитетының спорт комитеты рәисе Линар Гарипов аңлатканча, Казанда чаңгы узышларында катнашу өчен Дәүләт хезмәт күрсәтүләре порталы аша язылырга кирәк. Медицина белешмәсе булу зарур. Үзәк стадионда (Ташаяк урамы, 2а) мандат комиссиясе 3-7 февральләрдә 10.00-18.00 сәгатьләрдә эшли.

–“Локомотив” стадионына автомобильләрдә килгән очракта, Юдино бистәсенә керү юлындагы паровоз һәйкәле янында автомобильләрне вакытлыча куеп тору мәйданы булдырыла. Чаңгы йөрешендә “Тормыш сөючеләр” клубы әгъзалары да катнаша, – диде Линар Гарипов.

Татарстан Республикасы спортның академик ишү федерациясе вице-президенты Александр Плюшкин һәм спортның берничә төре катнашындагы Россия чемпионаты җиңүчесе Юлиана Фещенко чаңгыда шуарга яратулары турында сөйләделәр, башкаларны да “Россия чаңгы юллары” спорт чарасында катнашырга чакырдылар.