Динә Хөснетдинованың әнисе: «Динә кечкенәдән Тутберидзе командасында шөгыльләнергә теләде»

Спорт дөньясы белән кызыксынучылар бу көннәрдә якташыбыз Динә Хөснетдинова өчен ут йотып торды. Август аенда гына Этери Тутберидзе төркеменә күчкән 16 яшьлек Динә инде фигуралы шуу буенча җиңүләре белән сөендерергә дә җитеште. 

Фигуралы шуу буенча Гран-при ярышының өченче этабында Динә Хөснетдинова җиңү яулады. Казанда җиңү – Хөснетдинова өчен өлкәннәр арасында Гран-при сериясендә беренчесе булды. Спортчы ике өчле аксель һәм башка катлаулы элементларны һәм ирекле программаны да уңышлы башкарды. Прокат өчен ул 145,51 балл алды —  бу көннең иң яхшы нәтиҗәсе. Хөснетдинова ике программада 218,01 балл җыйды, бу аңа турнирның алтын медален яуларга ярдәм итте. 

Динә тумышы белән Зәй районы Аксар авылыннан. Ун яшендә Хөснетдиновлар гаиләсе Казанга күчеп килә, анда Динә «Стрела» мәктәбендә тренер Надежда Заякинада шөгыльләнә. Җиңүе белән котлап, Динәнең әнисе Резедә Хөснетдинова белән хәбәргә чыгып, җәһәт әңгәмә кордык. 
- Динәнең җиңүе бар татарстанлыларны шатландыра. Сезнең хис-кичерешләрегез нинди?  
- Бу ике көн бик катлаулы, борчулы, шул ук вакытта бик сөенечле дә булды. Казанда чыгыш ясавы бигрәк тә җаваплы иде. Туганнар, дуслар, таныш-белешләр җан атарга килде. Алар безгә ярдәм иттеләр. 

- Динә фигуралы шуу белән күптән шөгыльләнәме? Ни өчен кызыгызны нәкъ шушы спорт төренә бирдегез?
- Динә фигуралы шуу белән 3,5 яшеннән бирле шөгыльләнә. Бик хәрәкәтчән, шук, тиктормас булганга  аны бозга бастырырга уйладык. Айнур абыйсы (әтисенең энесе) күз-колак булыр, дидек. Ул – хоккей буенча тренер.

- Хәзер сезнең әзерлек Мәскәүдә үтә дип беләм. Күченеп китү турында карар җиңел бирелмәгәндер? 
- Динә кечкенәдән Тутберидзе командасында шөгыльләнергә теләде. Бу - тормышка аша алмас хыял кебек иде. Әмма Динә хыялын максат итеп куйды, тырышып эшләде. Казандагы тренеры Заякина Надежда Владимировна белән бергәләп уйлашкач, Тутберидзе командасына кушылырга кирәк дигән карарга килдек. Мәскәүгә күченү - бер хәл, ә алу-алмаулары әле билгесез иде. Динәне командага алгач, бик сөендек.  Тырышып-тырмашып эшли хәзер Динә. Әлегә үзем кечкенә кызыбыз белән Казанда. Әтиебез белән Динә Мәскәүдә. Тормышыбыз тулысынча диярлек фигуралы тууга яраклаштырылган. Үзебез сайлаган тормыш - тешли-тешли тартабыз. Уңышка ирешергә теләсәң, кайвакыт бар кыюлыкны җыеп, билгесезлеккә дә атларга кирәк. Барлык спортчыларның тормышы, язмышы шулайрактыр инде ул. Без искәрмә түгел.

- Җиңүләр, әлбәттә, сөендерә, әмма сезгә дә әти-әни буларак кыенга туры киләдер. Чемпион тәрбияләүнең серләре бармы? 
- Балаларыбызны, беренче чиратта, кешелекле, мәрхәмәтле итеп тәрбияләргә тырышабыз. Син зур спортчы дип әйткәнебез дә юк. “Бүгенге көн үтте, иртәгә яңа көн башлана, эшләргә кирәк”, - дибез. Әлбәттә инде, хуплау, мактау сүзләрен дә әйтми калмыйбыз. Алга таба планнар -  Россия чемпионатына әзерлек.